中環在線：
玲玲師傅教路 紅黃裝修化解凶宅
■麥玲玲教路裝修化凶。
樓市升到連凶宅都高位出貨，單係今個星期，市場就浮出兩單凶宅易手資訊，難怪有人話家陣凶宅唔可怕，最怕冇樓揸手咋。咁究竟點先可以住得安心呢？玄學家麥玲玲就建議大家喺裝修上面落工夫，夠陽氣就心都定曬喇。
繼死過人嘅荃灣中心
單位早前以近400萬元、呎價1.2萬元易手，喺正1998年「五屍命案」隔籬嘅德福花園單位，噚日又話以超過500萬元出貨，呎價1萬。
多鏡容易招陰
玲玲師傅就話，玄學上凶宅陰氣重，但都可以靠裝修增強陽氣自救，「鏡容易招陰，凶宅就唔好擺咁多喇」。此外，裝修用色最好唔好太過深沉，可以用番啲有生氣嘅顏色，例如黃色、紅咁，同埋盡量將窗簾長期拉開，等間屋夠光猛，加重陽氣。
咁究竟咩人住凶宅影響冇咁大呢？玲玲師傅就話，其實最重要都係住客心態，大家咁貴買層樓，都係想有覺好瞓，如果根本唔安心就無謂博。反而住客如果有宗教信仰，又或者係外國人、傳教士等等，本身百無禁忌就ok，凡是都係求安心。
查實玲玲師傅一向鍾意投資磚頭，佢話見過唔少friend買入凶宅，無蟹之餘重升得唔錯，所以凶宅都唔一定炒唔起。睇番今年樓市，玲玲都話升到咁癲要睇定啲，有機會可能考慮投資寫字樓。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com