冷門機械股跟住炒
2018年01月11日
港股再完成12連升，升幅一度仲超過200點，午市後先至跌番落嚟。港股以至全球股市去到咁高，投資者高位食胡，乃係本能反應。
港股昨日攀升，啱啱係內媒品題大陸券商鍾情的十隻股票，當中有重型機械股三一集團，佢係香港的上市公司三一國際(631)
，即刻爆上15%，收報2.48元，迫近一年來高位，足見港股跟住來炒的風向。
三一重汽先後彈高
香港係國際金融城市，對於重型機械工業認識唔深，所以呢類係冷門股中的冷門股，但內地就炒呢類股份的一帶一路概念。同一時間，美股的重型機械股都有炒作，好似最傳統做推土機的Caterpillar，就係去年表現最好的杜指成份股之一，創出左166美元的歷史新高。佢一年前由66元起步，一年升幅翻倍，升足成100美元，都咪話唔厲害。Caterpillar股份曾經係幾年前全球不景時狂插，尤其係大搞基建的中國都陷入緊縮之時，佢股價受壓好緊要，但時來運到，特朗普上台話要大搞基建，加上業績改善，所以股價就飆升。
內地券商睇好重型機械股，既有炒美國同類股的概念，加埋中國向外推動一帶一路，加上內地剛公佈今年各省市的投資計劃，仍然有不少基建，令到呢類股份受追捧。
若論到食正升浪，其實香港掛牌呢隻三一國際唔算好應，皆因佢主要做開礦機械，仲有掘進機、港口機械。呢兩年內地礦業陷入調整，佢股價一度見紅，令股價相當低迷。
到了最近一個財政年度上半年，業績先至好轉，能夠扭虧為盈，股東應佔溢利為1.32億元人民幣，而去年同期虧損為0.36億元人民幣，每股基本盈利0.0434元人民幣，所以買佢都係有啲順勢而炒。
內房股升浪仲未停
如果睇好重要設備股，中環茶友反而睇好隻中國重汽(3808) ，重汽主要做卡車，由於需求回升，佢今年業績應該靚仔。去年佢業績公佈理想，股價曾炒上12.44元，年尾股價回調，一度跌番去9元樓下，下跌幅度都幾大，呢排佢急彈再試10元水平 ，如果佢回番去接近9元水平，都可以短炒一下。
港股有勢跟住內地炒，A股新年後都9連升，尾盤在燃氣板塊的積極影響帶動下，上證指數收報3421點，升7點；深證成指收報11437點，跌10點，呢排興炒的三桶油，中國石化(600028)、中國石油(601857)A股都大漲，雙雙創階段性新高。
至於港股連日一口氣累漲左1839點，周三再由滙控(005) 及碧桂園(2007) 支撐造好，兩股合共貢獻恒指71點，恒指最高曾漲256點，高見31267，收報31073，升62點，國企指數收報12289，上揚33點，成交1406.26億元。
滙控成為升市火車頭，升1.4%，收報82.1元，股價創逾3年高位，單隻股份就推高恒指44點；近日強勢的港交所(388) 再升1% ，收報271.8元。
碧桂園近排走勢凌厲，周三升近7%，收報18.48元，為表現最佳的藍籌股，推高恒指27點；其他內房股亦造好，綠城中國(3900) 升12%，收報12.4元；富力地產(2777) 則升4%，收報21.9元；萬科(2202) 漲近2%，收報39元。
新爆新股眼科醫生林順潮的希瑪眼科(3309) 分配就快揭盅，消息指1手中籤率僅8%，即要以174萬元認購60萬股，即300手，才穩獲1手。
「頂頭槌」飛(每張2856.5萬元)的中籤率只有0.24%，即只穩獲分派2萬股，在1195張有效的「頂頭槌」飛中，有逾5張是以白表認購，實為罕見。今次招吸引接近12.6萬人申請認購，一手黨僅近2.5萬人。
陸羽仁
金融High Tea 舊文
來源 source: http://hdfin.stheadline.com