智取大市：中央抗淡友之戰
■投資者如果同中央同一陣線，博爆上嘅話，內銀、內險、內房、資源商品股相對佔優。 資料圖片
近排港股有一個特別之處，就係現貨成交偏少，但期指成交偏多，雖然話今個星期五期指結算，但係早幾日期指成交已經活躍，即月期指日日廿萬張，其中一個原因，係基金經理持有太多大型
科網股，要趁指數冇跌落去嘅時候，搵指數工具進行對沖，亦唔排除淡友準備趁機喺期指市場進行攻擊。
期指成為主要戰場，加上港股由大上大落，變為近期日升日跌，波幅收窄但仍偏向神經質，指數更容易短期內出現新方向。噚日升381點，未必代表好友明顯佔優，要記住無論方向係最終企喺邊一面，都唔會一日完成升跌。
喺目前形勢下，中央政治局講明，要推動信貸、股市、債市、匯市、樓市健康發展。政治局罕有地提到股市，似乎反映維穩股市成為較高層次任務，加上H股全流通試點細則出爐，與此同時要準備阿里巴巴、百度等公司發CDR，亦要趁一輪中美因素紓緩嘅一刻，把握機會去提升市場氣氛，中央發放好消息砌高股市嘅誘因實在大。淡友要面對如斯強嘅對手，造淡都有一定危險性。
如果閣下同中央同一陣線，博爆上嘅話，內銀、內險、內房、資源商品股相對佔優，起碼近期利好消息擴大開放、通脹、降準等等，點都Hit得中一兩瓣。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com