智取大市：貿易戰下的通脹
■中國以大豆還擊貿易戰，換言之壓抑通脹變成次等任務，部份通脹概念股已早一步破頂而上。資料圖片
目前市場唯一焦點，貿易戰你一拳我一腳，咁搞落真係似無底深潭。
投資者一早以為特朗普出完招，中國還擊，然後大家需時數籌碼，於是周三、四美股投資者以為壞消息短線出盡而大幅
反彈，殊不知特朗普原來可以玩加碼，中國驚都未驚過照跟，好似Show hand咁，於是周五美股又跌過。
無人能夠預測到中美即時下一步行動係點，但多數投資者怯於你一拳我一腳之際，股價其實已經率先更大範圍去反映形勢。中美對於貿易戰如斯重視，咁加息呢？通脹呢？中美會唔會因為集中貿易戰而一切停止運行？絕對唔會，但部署一定會變。
大家一定有留意中國還擊時祭出「大豆牌」，係人都識講，大豆消費量86%靠進口，倘若大陸大豆價格升25%，中國CPI會一次性增加0.4百分點。中國打出呢張牌嘅潛台詞，就係將對抗美國所謂貿易戰、科技戰，放到更高位置，而壓抑通脹已變成次等任務。
會唔會加息？中國近年由逆回購利率等等指標，去取代人行基準利率調節市場利率，但對抗貿易戰之餘又要穩定金融市場，利率亦會成為有效工具。如此一來，中央顧全大局之下，未來對通脹取態會否更寬鬆？通脹概念股跑贏大市，部份已破頂而上，所以話，股價已經比大家早一步、更全面去反映新形勢了。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com