經濟客艙：
男神嘅買樓論
■加息對近年買咗樓嘅業主增添壓力，對想買樓者亦有影響。 資料圖片
原來同阿寶講買樓都講咗成年，今日仲係原地踏步未上到車。回帶睇返棟篤男神黃子華過去嘅棟篤精華，簡直係預測嘅先知，「買到樓嘅買樓，買唔到樓嘅，永遠都買唔到樓。」
「好笑咩？」阿
寶收起平日嗲聲嗲氣，翹起雙手淡淡然說，「其實一啲都唔好笑囉。」好唔好笑都唔重要，都係想輕輕鬆鬆自嘲一下。其實關於二人嘅置業大計，唔經唔覺都拖咗成年幾。說實在，又唔可以跟首富般理直氣壯，跟阿寶講「不如趁後生搵過個。」面對現實，堅離地嘅樓價及永遠追落後嘅人工，再加上香港今年下半年也蘊釀加息，真係有諗過不如租樓。
加息話就話對過去兩、三年買咗樓嘅業主增添壓力，事實上我哋呢批準備上車嘅業主，受影響程度亦不在於供樓人士。面對高踞不下嘅樓價，加上美國繼續加息進程同香港息率上升嘅夾擊，即使銀行壓力測試條件不變，我哋借到嘅按揭金額越來越少，置業開支分分鐘倍增。
上網睇到有人用家庭月入3萬蚊做例子，採用H按、選擇分期30年攤還，息口喺2.15厘，最多可以借盡近400萬。雖然香港遲遲未開始加息，一旦進入加息周期、每次加息1/4厘，加息夠3次後，息口升至2.9厘，按揭借盡金額打咗個75折，由近400萬港元勁減到300萬左右。當然上述假設香港加息步伐嘆慢板，並非一年內咁急步加息。不過，我都計唔到點可以兩、三年之間同阿寶儲多100萬，或者拎多近十萬做首期。唯有重覆子華神金句，同自己講「買到樓嘅買樓，買唔樓嘅，永遠都買唔到樓。兄弟，好好加油!」
FB page：http://fb.com/seeforcaptain/
Captain Cool
經濟客艙 - Captain Cool 舊文
來源 source: http://hk.finance.appledaily.com