智取大市：化妝品股行情向好
■莎莎黃金周銷售增長近三成，反映女性用品行情已turnaround。 資料圖片
除咗誠哥退休，上個星期有另外兩單新聞吸住小弟眼球。
第一單係銅鑼灣SOGO感謝祭，門外等開門多人到變咗行人專用區。記者問一問排隊嘅大陸客，受訪者話香港化妝品平大陸三成，所以落嚟
掃貨。呢種旺場嘅程度真係多年未見過。
小弟呢兩日去太古城，途經港鐵嘅廣告牌，有九成係化妝品、纖體、美容等等嘅女仕產品廣告，成功變咗中產站嘅超級大戶。去到觀塘線，情況冇咁一面倒，但比例上仍然相當高。太古站嘅廣告壟斷情況，證明美容用品喺香港中產市場都係火爆。即使內地化妝品關稅長遠會變零，但17%增值稅同15%消費稅，暫時都形成中港龐大差價，大陸客依然會繼續落嚟香港掃貨。
莎莎（178）喺啱啱過咗嘅黃金周銷售增長近三成，睇埋上述嘅現象，反映女性用品行情已turnaround，究竟股價低位升一倍夠唔夠反映呢場突如其來嘅turnaround浪潮，小弟就覺得未夠。
第二單係新聞係太古地產（1972）放售太古城中心三、四期。計埋九倉（004）將海港城、時代廣場分拆為九倉置業（1997）以介紹形式上市，香港兩大收租佬都部署緊divest商用物業，將一向如珠如寶嘅核心物業善價而沽。喺加息趨勢之下，投資物業嘅回報率見頂亦非出奇事，住宅物業亦可以緊隨其後downturn。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com