經濟客艙：
逼爆崇光的啟示
■百貨公司大減價，內地購物客逼爆銅鑼灣。 資料圖片
內地購物客逼爆銅鑼灣，因為有百貨公司大減價。此群來自內地嘅購物客，其實同愛熱炒股買金嘅大媽，想法好接近，「個個都去買，冇理由唔去睇嚇啦，個個都去買嘅，質素都唔會差，唔買就蝕底喇。」
內
地購物客價格精明，專攻代購賺差價，佢哋好似喺外滙市場參與套息交易（carry trade），借入低息貨幣、買高息嘅資產，去賺息差。人民幣兌港元持續溫和轉強，由去年初每百蚊港紙換到90蚊人仔，家嚇每百蚊港紙換唔夠80蚊人仔，內地購物客或代購，來港掃貨更快更爽手。所以，銅鑼灣果間百貨公司日日逼滿人，係好黐線，但屬於情理之中。
消費購物推動經濟，原來呢句說話背後有數據支撐。本港今年首季經濟增長創7年最勁，私人消費開支及反映旅遊業嘅服務輸出勁升，成為主要增長引擎。諗起花旗國總統主張美國人優先嘅移民政策，實在也輸不起訪美旅客下降。旅遊業為美國經濟支柱之一。2016年美國錄7,000萬名訪美遊客，合共於美國境內花費2,500億美金。喺紐約市，外國遊客消費力較美國本地旅客更捨得花，開支消費多近四倍。如果美國將外國旅客拒於門外，損失嘅係美國本身。想向世界證明「再一次偉大」，毋須大費周章，來花旗國走一轉，慳水慳力建立軟實力。
香港不想只依賴內地客，除了開拓其他國家旅客來港外，都係繼續開拓其他國家旅客來港。香港人身體最誠實，買不買到樓，有假就要去旅行。留意返，今年首季本地居民的境外開支勁升13.6%，為去年第二季以來最大升幅。
Captain Cool
FB page：http://fb.com/seeforcaptain/
Captain Cool
經濟客艙 - Captain Cool 舊文
來源 source: http://hk.finance.appledaily.com