金手指：雙重認證乜嘢玩法
■上月底開始，投資者買賣股票需要雙重認證。 資料圖片
上周，平安好醫生（1833）上市。孫柏文見開市競價時段唔對路，就想沽出抽到嘅股份。點知，用手機沽唔到，因用開嘅中銀戶口要求做任何買賣前，寫入佢寄短訊去我香港電話號碼嘅密碼。我冇帶香港張sim卡去探親。最後
不但微利盡失，仲要輸幾千蚊，輸好冤枉。
中銀忽然咩買賣都要再認證，係證監迫出來。幾年前，試過幾單有人被盜用網上銀行戶口，盜竊者先買入極低流通量嘅股票，跟住高價賣俾呢啲被盜戶口。所以之後，有啲銀行，就當你買啲低流通量股票時，要再用短訊、指紋等做多次認證。我買呢種股票時都試過，亦非常支持。雖然大幅拖延買賣，不過話到明低流通量，時間嘅敏感性就會大減。要雙重認證既可明白，亦能忍受。不過，不吃人間煙的證監，一刀切要所有買賣都雙重認證。為乜呀？有網友PM我話：「炒貼價牛熊嗰啲，鬱親一兩分鐘先有短訊passcode，點trade呀？」
我想問證監，匪徒hack咗我戶口買騰訊（700），有咩搵錢機會？冇，又點解要雙重認證？我好愛國，整個「港人港股直通車」表，搵一堆唔使雙重認證嘅股票得唔得？
我啲錢，有份你哋出糧㗎，證監！林鄭月娥成日問點解佢咁不受歡迎，哈。我亦承諾，證監一周內冇改善，我將行動升級。
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com