姆劉會前送秋波
2018年05月15日
美國總統特朗普一時一樣，佢喺社交媒體突然發文，話正與中國國家主席習近平一同努力，令內地電訊設備廠商中興通訊(763) 盡快恢復業務。消息唔單止刺激咗同中興有關的手機設備股，港股借勢再升400點，實現六連升。
特朗普向北京送秋波，但自從領教
過佢的「五時花，六時變」作風，大家都唔敢過分興奮，好多人預咗中美貿易戰唔會一時三刻完美落幕。呢個星期習大大特使、國務院副總理兼中美全面經濟對話中方牽頭人劉鶴又去美國，同美國財政部長姆欽率領的美方經濟團隊，繼續就兩國經貿問題進行磋商。要細味的是，對於呢次會談，內地官媒講明呢次係美國政府邀請。
美主動放料促中方到訪
有猛人講起呢次去美國，喺消息曝光前中方其實都唔知。當西方媒體爆出消息，兩個先至接觸，所以最初根本未有時間表，更加唔好講內容傾啲乜。中方立場係美國開到口，咁無理由唔去傾，最後就快快手拍咗板喺呢個星期到訪。O依家特朗普喺劉鶴到訪前擺出友善姿態，係咪美國想製造期望，有陰謀理論就會懷疑，係咪想藉此向中國施壓呢？由呢啲猜測可以睇到，中國對美方舉措O依家都充滿不信任。美國將貿易戰戰場拉到高科技公司，要求中方不可以資助高科技公司發展，好明顯係想削弱內地企業喺高科技發展步伐，中國喺呢方面好難妥協，所以除非美國得個講字，否則見唔到事件有好快結束契機。特朗普作風係你估佢唔到，好似北韓核問題發展就出乎意料，總之眼前貿戰發展係向溫和而唔係激化方向走，市場就炒住先。中興供應商摩比發展(947) 急彈32%，收報1.19元，另一隻比亞迪電子(285) 報13.22元，升6.3%。
美國向中國施壓，一方面打擊內地科企發展，同時係為美國公司打開市場。對於開放市場，相信內地會比較願意作出讓步。內地對外資企業到中國經營門檻已降低。摩根大通宣佈，摩根大通企業及投資銀行已向中國證監會遞交申請，尋求建立一間持股比例為51%的全新證券公司，並計劃在未來數年內在監管條件允許下，將持股比例增加到100%。該公司還有意將其現有合資公司上投摩根基金管理有限公司，持股比例增加至控股水平。
金融業以外，喺電動車產業方面，特斯拉(Tesla)呢個月喺上海成立新公司，註冊資本一億元人民幣的特斯拉(上海)有限公司，經營範圍從事電動汽車及零部件、電池、儲能設備、光伏產品領域內技術開發等。
比亞迪受Tesla直接競爭
現時內地做電動車做得最火的係比亞迪股份(1211) ，不過佢今年股價表現差咗好多，主要係公司營運業績有啲不濟。早前比亞迪發盈警，預計今年上半年股東應佔利潤，按年下跌介乎71%至83%。公司預計第二季公司新能源汽車業務，將延續首季強勁發展勢頭。但受補貼減少影響，新能源汽車業務整體盈利，較去年同期有較大幅度下降。喺四月份銷售汽車3.74萬輛，按月下跌13.4%，其中新能源汽車銷量1.39萬輛，下跌0.2%。如果電動車補貼要再減，加上特斯拉自行進入中國銷售，咁對比亞迪都會有壓力。
港股氣氛改善，港股開市造好，之後升幅擴大，午後喺高位徘徊，恒指收造31541點，上升419點；國企指數收報12544點，上揚199點，成交1067億元。
股王騰訊(700) 昨升0.7%，收報411.8元；手機設備股各走極端，上周宣佈好消息的舜宇光學(2382) 上揚近8%，收報153.5元；剛公佈業績的瑞聲科技(2018) 逆市急挫近5%，收報115.8元。
陸羽仁
金融High Tea 舊文
來源 source: http://hdfin.stheadline.com