操盤手劄記：股神貼士信唔信？
■巴郡手持大量現金，股神講，會搵機會擴大中國投資。 資料圖片
美股季績期近尾聲，八成標普500指數成份股已派成績表，當中，近八成盈利好過預期。
美企首季賺大錢，「股神」畢菲特嘅投資旗艦巴郡首季卻不賺反蝕，輸11.4億美元。咪以為股神老貓燒鬚，睇番經營溢
利，其實大增49%至52.9億美元。咁點解蝕錢？主要因為按新會計準則，要將未變現嘅投資入賬。股神喺2月嘅致股東函，已指出呢個變動會扭曲盈利。
巴郡首季大手增持蘋果，持股量由1.653億股增至2.403億股，加碼45%。股神仲暗示，如果股價合適，會再掃貨。話時話，佢曾經講過唔買科技股，因為唔會投資喺唔了解嘅業務，但前年就開始買蘋果；佢亦曾經發誓唔再掂航空股，但前年又買西南、達美等航空公司。
股神向來偏好消費股，睇中蘋果，佢話因為蘋果產品如iPhone，好大程度係消費品。不過，相信仲有一個原因，就係巴郡手持大量現金，要搵回報。巴郡開始重倉蘋果時，蘋果股價喺110美元水平，至今升到184美元水平，累升67%，非常和味。
巴郡首季埋數，手頭現金有1,086億美元。據股神講，會搵機會擴大中國投資。佢有反口前科，信唔信呢？聽住先囉。大嗱嗱拎住成千憶美元，去中國shopping，會買乜呢？佢現時仍然持有比亞迪（1211），但比亞迪首季少賺83%，仲再發盈警，照計唔會再買，唔沽都偷笑啦。
股神喺1996年同2003年嘅致股東函都提到，最好嘅投資股票方法係買收費低嘅指數基金。佢同fund佬嘅十年賭約，已證所言非虛。既然股神睇好中國，不妨留意三大A股ETF（2822、2823、3188），話曬A股6月入摩、CDR年中啟動。滬股通上月持續錄得淨流入，反映外資已為A股入摩建倉。
割柑人
本欄逢周二刊出
割柑人
操盤手札記 - 割柑人 舊文
來源 source: http://hk.finance.appledaily.com