Can Bank：Iron Man大戰股神
■Elon Musk一向惹火，上個星期三喺Tesla季績向畢菲特挑機。 資料圖片
Iron Man大戰股神，呢個Iron Man並唔同Eric Kwok撞曬樣嘅Robert Downey Jr.，而係被喻為真實版Iron Man的El
on Musk。一向惹火嘅Elon Musk又同人舌戰，今次對頭人就係畢菲特。
話說Elon Musk上個星期三喺Tesla季績向畢菲特挑機，話畢菲特護城河投資理論有夠差（lame）同古舊（quaint）。到畢菲特上周六嘅股東大會，記者終於有機會問到當事人回應，畢菲特就話，Elon Musk可能可以摧毀到某啲領域嘅護城河，但我相信在糖果領域唔會摧毀到我哋。
遇到股神下戰書，Elon Musk亦即刻在Tweeter稱會開糖果公司，並將會係令人驚喜，之後再補多一個Tweet說：「我係超級超級認真。」
其實一個生意人，一個投資人，關係無乜必要搞到咁樣，眾所周知，畢菲特一向都對自已投資公司嘅管理好好，畢菲特亦都並非對電動車完全無興趣，大家可能記得佢揸住隻港股叫做比亞迪（1211）。
至於Tesla其實都有畢菲特所指嘅護城河，即係強勁嘅品牌或商業模式，但點解畢菲特睇唔上眼，可以參考之前股神投資公司嘅一啲指標，有強勁嘅現金流；公司市值遠低於佢相信嘅公司價值。而呢啲嘢，Tesla身上又好似真係見唔到，強勁現金流：Tesla集咗資先夠增產能，現金流根本談不上強。估值低：Tesla市值達到銷售額6倍、12倍市賬率，而市盈率更達到56倍。
今次新經濟代表挑戰舊經濟投資代表，散子都好期待Iron Man變Charlie嘅結果會係點，期待Elon超級認真嘅成果，究竟薑係老嘅辣定新嘅辣？
散子
散子
Can Bank - 散子 舊文
來源 source: http://hk.finance.appledaily.com