太子的教訓
2018年05月30日
昨日市場八卦話題係羅老太打官司。中環茶友話，早排大馬選舉，92歲的馬哈迪勝出做首相，請埋94歲的糖王郭鶴年做顧問，O依家香港有鷹君羅老太杜莉君，以98歲之齡同滙豐打官司。中國人計歲數連係肚內10個月都計埋，所以羅老太係近百歲單挑滙豐。
羅老太呢
場官司，好多人睇成幕後對手係細仔羅啟瑞，對現任鷹君主席羅嘉瑞；但官司牌面對手係羅老太，對創辦人羅鷹石的信託人滙豐。羅老太質疑滙豐無執行她的命令，所以要炒佢魷魚，滙豐則以信託人身份，全權管理信託。官司的關鍵點係羅老太有無權踢走滙豐，另外再搵信託人。
老人家要人膝下承歡
羅老太已經成百歲人，好多人會諗佢可以食得幾多，着得幾多，雖然佢仲好精靈，但打官司始終好辛苦，咁又何必呢？呢啲情況十居其九係為咗仔女。羅老太一向疼錫細仔羅啟瑞，今次佢要踢走滙豐，就係話滙豐無用家族信託資金去增持鷹君，令主席羅嘉瑞坐大。
代表原告人羅老太的資深大律師余若海喺庭上就指，滙豐信託涉及的其中一樣利益衝突，係羅嘉瑞若增持鷹君股份，餘下在市場股份持股比例會被人超越，滙豐信託或會在這場「數字遊戲」中失去最大股東地位，但滙豐信託卻無視之為一個威脅。法官就反問，原告人成立家族信託原因，是否旨在維持對鷹君有效控制。余若海解釋設立家族信託的主要目的是減省遺產稅，但同時亦為保持原告人家族對公司有控制權。咁究竟滙豐作為信託人，應唔應該介入家族成員股權爭拗，就要睇信託條文。
茶友話，好似羅老太為咗疼錫嘅仔女打官司，呢種心態唔好以為唔普遍。老人家用咗大半生創造一番事業，臨到晚年佢會覺得，邊個對佢好啲，先至值得將個江山交畀佢。喺中國歷史上，好多英主都係臨老廢太子，連最英明神武的漢武帝亦如是，皆因太子諗住將來接棒，無時間得閒陪住皇上，結果咁就行錯咗棋。對老皇帝嚟講，最緊要係有人膝下承歡，個江山係點未必係最重要，呢樣嘢對好多太子嚟講，真係要認真吸取歷史教訓。
講番鷹君雖然鬧爭產，但對股價無乜影響，昨日收報40元，微升0.2元。鷹君主要透過產業信託，持有朗豪坊、寫字樓同幾間酒店，另外自行發展地產。集團喺年前以低價投咗科學園旁邊塊地，O依家增值應該好可觀，未來公司盈利穩定向好，相信受官司影響有限。睇番同樣係持有零售同商業樓面的九龍倉置業(1997) 呢排表現唔錯，昨日又逆市攀升，股價升2.8%，收報62.6元。若然鷹君股價回落，應該都可以執吓。
有人博豐德麗收購加碼
除咗八卦爭產消息外，大市繼續悶局，無乜消息下，恒指跌307點，收報30484點，成交876億元，照咁嘅走勢，五月大市埋單應該回落，股王騰訊(700) 微跌0.8%，收報402元，暫守400元關。內銀內房拖低大市，建設銀行(939) 與滙控(005) 股價同創十日新低，建行跌1.4%，收造7.98元；滙控下滑1.2%，報收75.9元。
早兩日升得多的醫藥股同教育股都調整，中國生物製藥(1177) 升至20.9元破頂後倒跌5.9%，收報19.2元。下周一正式染藍的石藥(1093) 周三除淨，周二股價回吐5%，收報24.75元。教育股回吐仲勁，澳洲成峰高教(1752) 急跌15%，收報0.75元；楓葉教育(1317) 挫7%，收報13.7元。新股21世紀教育(1598) 逆市上揚，收報1.71元，較招股價1.13元升51%，每手3000股帳面賺1740元。有港鐵主席馬時亨撐場的餐飲集團叙福樓(1978) 認購超額過千倍，佢今日在主板掛牌，上市前夕暗盤暗盤價曾見2.2元，較招股價1.1元升一倍，按一手2000股計，每手帳面賺2200元。
麗新發展(488) 提出私有化麗新系的豐德麗(571) ，每股豐德麗作價現金1.3元，較豐德麗上周五(25日)收市價1.35元，折讓3.7%，連同註銷購股權等，要約價值共約12.66億元；私有化完成後，豐德麗將會撤銷上市地位。市場人士認為，今次收購價折讓較大，吸引力低，估計較難獲得小股東同意，相信成事機會不高。麗展昨日逆升1.2%，收報13.42元，豐德麗收報1.4元，升咗近3%，距離收購價再遠啲，似乎有人係博收購會加碼。
陸羽仁
金融High Tea 舊文
來源 source: http://hdfin.stheadline.com