Money Walker：港人大灣區內何處容身
■政府向港人推銷大灣區概念，難怪有陰謀論認為，政府最唔想港人在香港買到樓。資料圖片
港鐵（066）主席馬時亨提議港青於廣州南站置業，再日日坐高鐵來港返工，成一時佳話。
大灣區內11個地方各自有分明角色，本身已有合作，亦
唔存在關稅等貿易壁壘，刻意打破地域邊界成立大灣區，再大力向港人推廣，難免令人費解。再者，港澳與廣東省擁有截然不同嘅文化背景與法律制度，區內日常語言都有別，如中央並非有意重新分配區內各城市角色，又何必刻意成立大灣區。
講真，香港人精明之極，只要大灣區有金執，根本毋須一眾高官與親政府機構落力推銷，都會自動自覺湧去呢個「一小時生活圈」。好似香港好多發展平平嘅藝人，一轉身返大陸就變身當紅小生，唔使政府呼籲都識北上掘金。
可惜絕大部份港人只係平民百姓，返大陸做開荒牛要面對嘅係幾千蚊人仔嘅超低月薪、高昂嘅高鐵票價、甚至係「海岸居」一類大陸樓騙局嘅挑戰。如果香港高官sell大灣區概念時，唔止一味以一堆硬數字做材料，而係回應一下呢啲貼地問題，推廣成效肯定大增。
由梁振英時期嘅一帶一路，到林鄭𠵱家所擁抱嘅大灣區概念，特首都不斷強調香港要配合內地發展，難怪有陰謀論認為，最唔想港人買到樓嘅就係政府。事關有樓在手者，絕不會因為貪圖大灣區樓價平過香港而離港別井。話說回來，睇到早排北京清理低端人口嘅行動，難免令人擔心假以時日，不屬高端人口嘅自己，終有一天不止被掃出香港，連大灣區內都無處容身。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com