【實力取勝】貿易戰下仍有股可炒（陳承龍）（第182期）
2018-6-21 15:24:51
中美貿易戰加劇，恒生指數6月19日一度跌超過900點，好多人又大嗌股災，不過小弟係長期好友，其實個市仍然喺29000點到32000點呢個區間上落，冇乜大不了，過去呢幾個月來來去去，上又
快落又快，chok上chok落，好似我呢排寫緊書，講到對十年周期嘅分析。其實好多時臨破頂，2000年同2007年大市臨破頂之前，都會喺一個大上落區間整固，又上又落，悶你一輪先會爆上去，小弟覺得2018年呢幾個月，形勢同嗰兩年好似咯。
之但係2018年有所不同，就係有潛在不利好因素：美國總統特朗普，貿易戰收25%關稅，都唔嘢少，成件事都係惡搞，故此小弟對今次大市破唔破到頂，亦都有少少保留。最好嘅做法，梗係靠邊站，只要個大市企到29000點樓上，即係250天線守得穩，後市應該仲頂到嘅。如果堅持要炒股嘅，就要搵啲同外貿無關，單純係中國內部需求有關嘅股票，例如呢排成日介紹嘅物業管理股，其中中奧到家（1538）可以望下，喺19號大跌翌日狂升11.54%，明顯強勢；醫藥股可以留意石藥集團（1093），燃氣股可以留意天津津燃公用（1265），教育股可以睇睇21世紀教育（1598），呢啲都唔係唔貿易戰影響嘅行業同股票，近來走勢上亦都係相當強，抵受到跌市，相對其他股份安全。
另外呢，小弟嗰本萬眾期待、被阿正催到裙拉褲甩嘅大作，仍然係密鑼緊鼓當中，應該趕得切喺書展出，希望到時大家支持下啦，堅係嘔心瀝血，內容係小弟入行20年嘅點滴，希望可以同年輕人分享下經驗。因為其實呢，小弟都係好彩㗎咋，後生仔係十字路口之中，肯衝肯做，好多嘢都船到橋頭自然直㗎啦，好似俾阿正催咗成年稿，最終咪又係會交到，係咪先？
實力取勝 - 陳承龍 舊文
來源 source: http://www.winmoney.hk