財經評論：半年炒股大時代
■2018年只係過咗半年，但市場發
生嘅事多到應該可以寫入投資教材。資料圖片
中美貿易戰又來過，港股大市周二即刻插穿三萬關。有同事講笑咁話，呢個2018年好似幫班基金經理上咗十年堂咁，政治、經濟、科技，你數得出嘅知識全部都需要用到。的而且確，2018年只係過咗半年，但發生嘅事多到應該可以寫入投資教材。
一月個市好似正正常常咁，個市延續返上年強勢，恒指仲破埋頂，最高升到33484點。但係，踏入2月，美國非農就業數據造好，加息預期升溫，美債息立時抽高，個市旋即由高位大跌。呢個時間基金經理唔單止要重新諗嚇基本因素會唔會受通脹拖累，同時仲見識到程式交易有咩缺點。股市其後漸漸有返起色，不過投資界又有新嘢要學。3月期間，美國總統特朗普為貿易衝突揭開序幕，股市亦因而越來越複雜。大家此時先要理解國際關係、美國中期選舉局勢，又要計嚇美國對鋼、鋁需求。
但，咁都未算！隨著貿易衝突越演越烈，各界意識到貿易衝突原來好大機會係衝住「中國製造2025」而來，基金經理、策略師、經濟師因此全部都要喺呢個議題上落啲功夫，了解相關行業供應鏈係點、對中國有幾重要、美國又點解會關注。然後同場加映嘅中興（763）事件，又順便向大家上多一課，展示中國晶片、科技硬件技術原來仍有好多地方需要改進。
淨係數都數到咁多件，都未計集中投資中港股市嘅基金經理同時要睇埋北水流向、內地消費升級趨勢、「A股入摩」影響等等。2018上半年唔知大家投資收入如何，但刺激程度相信永世難忘。
記者：莫亦熙
財經評論 舊文
來源 source: http://hk.finance.appledaily.com