智取大市：輸到瞓街的故事
■A股高位跌兩成，無論係大調整定熊市，一樣有人輸到傻。資料圖片
滬綜指高位跌兩成，我等標題黨當然不放過機會，大大隻字「技術性熊市」。股市跌兩成有一定殺傷力，無論係大調整定熊市，一樣有人輸到傻。
近排唔少人將中港股同3年前股災相提並論，反而令小弟諗起一個人。呢
位仁兄作為基金經理，玩法向來大上大落，金融海嘯幾乎輸身家，畀佢追得返，有膽有天份又有運。
佢嘅玩法絕不常規，風險管理意識亦薄弱，2015年4月，大大聲話自己贏唔知幾多成。緊接7月初大時代股災後，佢話自己高位減唔少磅，但莫名其妙地，唔知佢做咗乜嘢操作，佢面青青留低一句：「如果之後大跌，我就瞓街架啦！」結果……8月迎來走資恐慌，真的輸了。的而且確，佢自此低調起來，報道上仍見佢講買樓經，甚至有聽過涉足Bitcoin掘礦，但近年已少提股票。
輸到瞓街，可以有幾個劇本，第一冇止蝕，第二係太高槓桿，第三係交易方式不合時宜導致屢戰屢敗。冇止蝕輸在冇經驗，高槓桿係因為太大野心、不自量力。自己交易方式不合時宜，要改最難。呢位基金經理睇嚟輸在後兩者。
留得青山在係人都識講，但故事教訓大家，講得「再輸我就瞓街」呢句說話之前，就好應該Stop自己，再畀耐性了解同增值自己後，等機會重新出發。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com