收市閒情：「四盆冷水」淋小米
■小米創辦人雷軍。資料圖片
「小米（1810）招股，抽唔抽好？」抽新股好多時都係抽氣氛，品牌入屋就更加分！小米係好入屋呀，但衰在冇氣氛，仲有「四盆冷水」照頭淋。
小米本來係威係勢，又話要成為第一隻中國存托憑證（CDR）兼香港「同股不同權股」，上到就勁，
上唔到咪Doo囉！話說，中證監精心研究小米盤數後，用84個角度提出84條問題，最後逼到雷軍放棄同步上CDR。本來諗住用CDR錦上添花，𠵱家一盤冷水照頭淋！掃興之餘，我又想知啦，點解小米連中證監都過唔到，落到嚟香港反而過到？
𠵱家過唔到中證監嗰關，本來興奮感已減一大半，最慘係咩？係啲券商！各大小行，都以為小米好炒得，小米變大米，之前條街大大話話預留超過1,500億元孖展額。銀根抽緊，仲搞到港元短期拆息扯高曬！𠵱家好啦，大家反應本來已經麻麻，但有啲券商仲要收3至4厘孖展息！最後「賺價蝕息」都仲好少少，最怕係「蝕價蝕息」，真係偷雞唔到蝕渣米。
第三係，小米招股價17至22元，預測市盈率39.6倍至51.3倍，雷大哥，呢個PE係比原裝正貨蘋果（Apple）嘅16倍仲要高呀！小米你係靠向蘋果致敬起家，但小米實在唔係蘋果呀，唔通一部小米手機等如一部兩部iPhone嗎？我哋唔好睇外國，睇埋中國啲科技同業，騰訊（700）預測PE只係37.15倍，阿里巴巴先係32.2倍。
更重要係，每間科技公司嘅發佈會，都係曬冷式獻技，點知小米8首輪發佈會，竟然俾人揭發連環造假，雷軍台上面吹噓嘅美顏相機，都俾人踢爆背後大螢幕張相，其實唔係小米8所拍攝嘅傑作。
即係咁，𠵱家美顏App隨便Search就有，連一個咁基本嘅App都要造假，仲有咩大家會信係真。
投資市場行走「缸」湖，俾人呃係預咗，但最怕騙子眼高手低，輕易就俾人踢爆，到時本來真面目曝露於人前，赤裸之下，散戶不勝寒。
千頌C
http://fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.finance.appledaily.com