智取大市：小米一個大可惜
■小米喺低檔智能家居市場嘅地位，相信比手機市場穩固。 資料圖片
大家最睇淡嘅小米（1810）勁升13%。呢一刻冇人覺得小米唔貴，2018年PE44倍，但貴還貴，小米嘅睇頭，一直畀散戶投資者忽略。2017年收入分佈裏面，有20%來自包括智能家居產品在內嘅IoT
與生活消費產品業務，長遠比例會繼續升。
之前本欄提過，入門價錢嘅智能家居產品定位相當不錯，皆因智能家居滲透率低，然而長遠係大趨勢。
硬件純利率堅持5%樓下，令小米盈利能力構成風險，理應估值打折扣，即使以招股價計嘅40倍PE都係貴。不過，此舉令公司mission非常清晰，其實對投資者嚟講，只係好壞參半，好處係清晰嘅mission令公司長遠較容易保持高強執行能力。小米喺低檔手機市場作為後來者都可以成功一段短時間，面對未有主要對手嘅低檔智能家居市場可能更如魚得水，未來小米喺呢個市場嘅地位，相信比手機市場穩固。
可惜嘅係，小米上市冇人係平買，即使未來可能遇上股災，想有跳樓價都好難。2007年香港上市嗰隻冇淘寶嘅阿里巴巴，喺牛市高𥧌上市正正係前科，結果被私有化再重組成今日喺美國上市嘅阿里巴巴了。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com