收市閒情：小米那位「倒米的公關」
■小米負責上市嗰位「神級」公關阿姐，短時間內得罪所有記者，真係史無前例。 資料圖片
小米（1810）上市，係震撼嘅……震撼個位唔係咩首隻「同股不同權」，唔係咩個鑼大過乜，而係公司如何短時間內，得罪所有記者！
話說小米今次負責上市嗰位「神級」公關阿姐
，喺上市儀式前千叮萬囑記者「It is a big event」要早啲去咁話，講一次都未夠，仲要補多句「I warn u-a lot of media that day」知你小米好勁啦，好巴閉啦。做公關又好，記者又好，做人都係客氣啲好，要用到「警告」真係言重。
好啦，咁要幾點去到呢？上市儀式一般9點左右開始，咁公關阿姐要記者7:30打鑼咁早去排隊。咁你勁到要Warn記者朋友，唔少傳媒都真係7點半到場，諗住霸個靚位，等偉大雷布斯接受記者訪問！好啦，等咗兩粒鐘，雷布斯鑼又敲完啦！呀！佢竟然行入玻璃房，然後全世界望住佢，只係同CCTV做獨家專訪！咁叫其他傳媒7點半到場做咩？要記者做道具佈景版，營造一個萬眾期待，全城迎接雷布斯嘅畫面嗎？
好戲在後頭！本來公關教員工，喺公開場合如何應付記者，係佢哋責之所在。不過實在估唔到，公關會喺上市儀式當日先派畀員工，仲要放喺枱面畀大家任攞！即係話，無論你係員工，投資者，定係記者，都可以隨手就拎到呢份「如何預防記者」嘅文件，文件最顯眼係咩？就係用紅色字印上嘅「媒體不負責任」呢六隻字！其實作為一間科技公司，點解唔用自己個「米聊」？再唔係Send個Email好難咩？再者，現場先派實體指引，係咪想員工遇記者時，好似毛記（1716）Dickson出席上市儀式時，拎住張紙照讀呢？
好啦，睇到呢度，大家緊係想知位公關阿姐點回應，佢喺微信度出Post，定性所有批評係「無聊和低級的噪音」。
小米係靠「飢餓行銷」起家，食嘅係口碑。不過，小米去到上市呢啲咁緊要嘅時間，竟然請一個無做上市經驗、仲要「做人無公關」嘅公關？到底小米嘅管理，要出幾大嘅問題，先可以引爆一場史無前例，令中港傳媒齊心討厭小米嘅一場災難？
有傳話原本有另一間有經驗嘅公關公司想接呢個客，但小米就嫌人貴。即係咁，小米一向Budget鍊到盡，以香港為例，以往所有公關事宜，都只係靠一個In-house PR去做，甚至佢借電話畀記者試用，都唔可以用速遞公司送，要佢自己親自送上，因為冇錢。
咁慳？為咩呀？雷軍最新發微博，話「這兩天像一場夢，厚道的人運氣不會太差」佢運氣當然唔差，上市前先獲授100億人仔股權激勵；然後極速入恒生綜指，富時中國50指數，基金焗買，焗幫佢托價托身家。
千頌C
收市閒情 - 千頌C 舊文
來源 source: http://hk.finance.appledaily.com