魚樂無窮：跌市的第一大忌
■弱市時股票往往會越跌越深，切忌向下溝貨。 資料圖片
今屆世界盃金球獎（最佳球員），由克羅地亞發電機莫迪歷奪得，可謂實至名歸，不過有戰友拗頸，話點解唔係冠軍隊法國球員拎。
從股市角度解釋，藍籌股每年穩打穩紥，交出好成績派發高股息，但每年十大升幅榜往往冇佢哋份
，而係不知名嘅細價股甚至妖股，證明做得好唔一定可以做冠軍。
近排做財經節目，觀眾的提問差不多像倒模般︰「我買咗XXX（輸一成係起錶價，更多嘅係輸兩三成），喺家跌到咁殘，好唔好再買呀？」
我嘅答案都係倒模般︰「如果你係因為平咗所以買，唔該你唔好出手，因為呢個動作叫做溝貨，唔係分注吸納，仲要係向下溝，炒股大忌也！」
弱市下股票往往會越跌越深，所以越買只會越跌，去到你面青口唇白沽貨一刻，往往就係見底之時。要減低心理壓力，不再胡亂加注是最佳方法，始終有cash在手，點都會淡定啲，成手蟹貨再遇上大跌市，好容易做錯決定。
有券商唱好平安好醫生（1833）及碧桂園服務（6098）將納入港股通名單，刺激兩股齊齊炒高，結果係點要8月10日先知，畀我揀一定係炒後者，無蟹貨兼有大股東增持做後盾呀！
唐牛
http://fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.finance.appledaily.com