科企二奶命
2018年07月19日
亞馬遜老闆貝索斯取代微軟創辦人蓋茲，成為全球首富，而且財富數量達到歷來最高，成為市場話題。喺大家覺得科企有前途下，資金對呢個板塊戀棧不捨，連落後的香港科企，都來個炒落後。
貝索斯取代雄踞寶座多年的蓋茲成為全球首富，其實唔令人意外，隨
著亞馬遜股價不斷上漲，同市場人士睇好公司前景，佢摘下桂冠只係時間問題。貝索斯不單止係美國首富，仲被形容為歷來最有錢的富豪，呢個稱號涉及不同時代幣值，無辦法直接比較，但就可以用不同標準去量度。有人話，如果用個人財富同美國生產總值計，佢未係最勁。無論如何，貝索斯嘅財富就算唔係前無古人，都應該相差無幾！
貝索斯取代蓋茲，人選唔同咗，本質可以話分別唔大，蓋茲打造天文數字的財富，同樣係靠主導咗科技潮流，以微軟開放程式壟斷咗個人桌面電腦的操作軟件，打造暴利生意。
當手機取代咗桌面電腦，美國人上網九成用手機時，蓋茲首富時代過去，幾乎係必然的事，佢兩個唔同嘅係，微軟係創造咗巨大盈利，令蓋茲登上咗寶座；貝索斯則靠公司高估值，令帳面財富暴增。貝索斯能夠未賺大錢已成首富，皆因大家相信網絡經濟已經來臨，作為潮流領導者，大部份人想法係打佢唔贏不如加入佢，於是資金大量押注喺佢身上，令佢未賺大錢已成巨富。
美科企有堅船利炮做後盾
美國科網巨企喺技術上固然領先，而且佢有美國船堅炮利做後盾，幫佢打開市場。陸羽仁早前同騰訊(700) 旗下微信管理層傾起，點解微信喺中國咁勁，功能又多，但用家有點不出國門的感覺呢？對於呢個咁尷尬的問題，佢回應係英文係全球語言，微信喺研發上不以此為基礎，係造成局限性原因，O依家佢哋嘅策略係就地取材，無論喺遊戲研發抑或係社交媒體，都考慮在境外加強研發，或者索性入股併購發展。
微信管理層呢個解釋，當然無將好多深層次限制講出嚟，但倒過頭來就說明咗美國科企喺市場上的優越性。中國科企有本土龐大人口，但如果要進軍國際，暫時就過唔到美企呢關，難聽啲講最多都係二奶命，所以喺估值上都做唔到。另一個不可忽視的因素，係大量科企喺香港上市增加供應，都會削弱咗估值，呢啲理由解釋咗點解美國納指可以屢創新高，香港掛牌的內地科企變成只能炒落後。
騰訊昨日微升0.6%收378元，人哋創新高，但騰訊距離高位476.6元，仲低20.6%，事實上打貿易戰又唔見得會影響到騰訊咩收益，所以簡單一句都係估值落後。大行又單單因為騰訊上唔番高位，就調低佢目標價，諗落都有啲騎呢。
雖然內地科企做唔到一哥，但比起好多舊公司都幸福得多，因為佢哋仍然可以喺資本市場籌資拓展，創辦人可以一朝致富，股份繼續係市場焦點。港股昨日反彈無力，恒指收報28117點，回跌64點；國企指數收報10578點，下滑13點，成交762億元。喺買賣兩閒下，科企都仲係較熱的板塊，小米集團(1810) 借住中港兩地傾掂俾北水買小米這類股份的方案，逆市升3%，收報21.55元。其他科網股跟住造好，平安好醫生收報49.8元，大升7%，估計未來呢類股份主要都係跟住美股後面走。
美加息機會增壓低人仔
除咗科企外，要留意係美元隨著聯儲局明示會繼續加息後呈強，相對下人仔再有壓力。中國外匯交易中心公佈，人民幣兌美元即期跌破6.71關口，收報6.7145兌1美元，創去年8月7日以來新低，下挫355點子。官方早上開出的中間價亦創逾11個月新低，報6.6914兌1美元，跌93點子。離岸價亦跌破6.74關，創近一年低位。
太平洋投資管理公司(PIMCO)認為，中國將容忍人民幣波動上升及適度貶值。該公司仲覺得，中美貿易爭端最終可能達成妥協，屆時中國貿易順差幾乎肯定因此大幅收窄，從而削弱基本面和匯率。該行又稱，人民幣貶值有助抵銷美國關稅影響，估計第一輪美國關稅將使中國國內生產總額(GDP)增幅減少0.1至0.2個百分點。人仔匯價轉軟，對經濟長遠有好處，短期可能就對中資股有壓力。
陸羽仁
金融High Tea 舊文
來源 source: http://hdfin.stheadline.com