智取大市：救市三招的盤算
■內地煤炭需求殷切帶動煤價，兗煤昨升一成，市況好的話，應該未炒完。資料圖片
由上周三MLF，去到周五資管新規放鬆，然後今個星期一國務院講嘅「更積極財政政策」，終於刺激港股反彈。除咗利好政策刺激經濟、令資金流回復正向之外，另一方面反映中央唔怕人民幣貶值，仍計劃
推出增加人民幣供應嘅刺激措施，雙重意義固然增加市場信心。
其實政府推出財政政策，要達致效果，最難拿捏嘅係出招會唔會出過籠，令資本市場過熱、通脹壓力上升、泡沫催生。出得招唔夠力，又自然刺激唔起信心，弄巧成拙形成危機。中國今次嘅選項，係唧牙膏式出招，務求睇嚇去到邊一招嘅時候，市場會收貨。今次冇一個積極財政嘅實質數字，亦可以畀中央空間去睇定啲，慢慢調節「更積極財政政策」嘅規模。想有新嘅資本市場泡沫催生？當然不是09年劇本。
推出財政政策係好難啱啱取得平衡點，加一兩招，加加嚇最後會發現加大咗，次次都係咁。不過，每次炒過籠，又會收水、調控、打擊失控泡沫部份，成為一個永續玩法。
潛在受惠積極財政，兼且行業狀況理想嘅股，較有睇頭。內地陝西多間煤礦堆場幾乎零庫存，需求殷切帶動煤價，兗煤（1171）昨日升一成，市況好的話，應該未炒完。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com