阿爺放水 股市浮起
2018年07月25日
周初內地大放水，成為突發好消息，星期一內地股市彈得多、港股彈得少，到昨日內地再升，港股終於跟番上，應聲彈高406點，第二日升市開始和內地同步，內銀、內房成為領軍股份。
中央周一大量放水，呢招相信係應對美國貿易戰對中國帶來的壓
力。本來中央推行去槓桿，又想抑壓樓市升勢，現在某程度係作出妥協，換取紓緩貿易戰造成的衡擊。從策略上睇，中央讓股市先跌一浸，到低位出手托一托頂住，避免經濟同市場信心崩潰，都係正路手法。對市況而言，中央的維穩行為，發揮一定利好作用。
插得愈急 維穩愈大力
中環茶友講起，阿爺出手減壓，多少同內企遇到的資金壓力有關，特別係民企資金鏈愈來愈緊，包括內地P2P平台近日頻頻爆煲。
自從今年四月有平台出事，引發連鎖效應，一方面係投資者減少投入，同時有部份借款人惡意逃債，搞到放貸平台風聲鶴唳。日前有平台就宣佈主動退場，停止業務營運，只係繼續維護網站及應用程式，不再發行新產品及拓展業務。業內估計，網貸之家早前數據顯示，今年以來有兩百幾間P2P平台爆煲。
大陸網貸平台可以話係內地金融生態特色。由於傳統國有銀行對小微企業缺乏服務，加上個人消費貸款發展不足，在網絡金融之風吹起後，網貸平台如雨後春筍，但由於發展太快，形成有啲風險管理不足，現在出現風吹草動，就引發連鎖效應。
本來呢啲可以當成係市場發展現象，也是中央清除金融隱患同去槓桿下促成的結果，但撞正中美貿戰，就令人關注對消費造成的影響，中央O依家出手泵水，相信係想維繫信心，防範急劇動盪造成風險。由於中央出手維穩，相信未來股市跌得愈急，托市力度愈大，皆因阿爺都不會坐視不理。
喺內地放水下，雖然美股牛皮偏軟，中港股市齊揚。上證綜指重上2900點，創一個月新高。交投熾熱，滬深兩市成交合計較上個交易日增近兩成至4929億元人民幣。上證指數全日收報2905點，升1.6%，連續三日上揚；深證指數收報9465點，升1.6%。
港股跟隨A股高開，其後升幅持續擴大，一舉重上10天線(28327) 及20天線(28431) ，最多更升440點，高見28694點；收市升406點，升幅1.4%，接近內地的1.6%升幅。中資股帶動下，國企指數跑贏，升242點，收報10973點，成交1078億元。內銀股繼續領軍，建行(939) 升3.2%，收8.14元；工行(1398) 升3.8%，收5.82元，成交分別居成第三及四位；中行(3988) 亦升1.7%；農行(1288) 升3.2%。內房股走勢都幾凌厲，潤地(1109) 升逾半成，報28.1元，成升幅最大藍籌。碧桂園(2007) 亦升逾3%，收13元。屬於國企、業務較穩的中國海外(688) 升咗3.4%，收報24.6元。
中資科技股走勢繼續落後大市，騰訊(700) 收升1.2%，報375.2元，小米(1810) 逆市跌4%，收18.24元。人升佢跌，似係散戶接，大戶沽，有啲險情。
亞運舉行在即，轉播權唔便宜，有線電視(1097) 好豪去接盤，將會透過收費頻道同免費頻道奇妙電視，以及旗下的互聯網及流動平台直播賽事。早前，另一個收費兼免費電視媒體Now播完世界盃，仲為收視帶來突破。聽電視圈大佬講，由於樂視爆咗煲，世界盃轉播權要「喊欄」，結果俾Now投到。呢次世界盃價錢唔太貴，皆因當時有線無去爭，無線就覺得投咗都要花大筆製作費，計落無乜着數，所以無大力去馬，搞到轉播權要大平賣。有咗呢個先例，電視台自然唔肯畀大錢去播亞運。
有線又為公眾服務
亞運商業價值有限，但有線電視已連續五屆播放，加上香港運動員過去幾年都有獎牌攞吓，若然無直播實在有點兒那個，最後佢都決定繼續做，相信都要貼。不過，公佈消息後有線股價趁住升市炒作下，收市報0.133元，升逾5%，有少少唔知升乜的感覺。
有線股價今年跌市中屢次下試低位，從生意角度睇，可見將來應該都賺唔到錢。早前九倉抽身離場，股權不惜益買家大割引，當時有唔少人博炒，陸羽仁認定呢個乃係離場最佳時機，絕對不宜落注炒作。有線呢次播亞運，看來都係純粹為公眾服務，從股東角度都係啃多塊雞肋，股價炒上又係考慮離場之時。
陸羽仁
金融High Tea 舊文
來源 source: http://hdfin.stheadline.com