智取大市：增長股都有周期
■半導體為中央迫住催谷嘅行業，長遠盈利展望進入上升周期，華虹成追捧對象。 互聯網圖片
騰訊（700）以前一而再、再而三找到增長新引擎，股價長升長有。壟斷手遊後，騰訊近期連番投資金融、智能零售、Cloud、人工智能、視頻，似乎想以亞馬遜作為模板，去發展零售物流
等等新增長業務，但未來要過到阿里嗰關，優勢不及當初進入廣告、手遊市場咁明顯。暫時收購未有邊樣能透過龐大用戶網絡去產生乘數效應，發展進度有點停滯，於是股價創今年低位。
舜宇（2382）股價亦告別一浪高於一浪。今年1至7月手機鏡頭出貨量增長逾五成，但新出貨量集中較多喺低毛利產品。舜宇舊年7月中旬已發盈喜，而今年去到接近8月都冇盈喜，盈利或不如預期。稍後要睇新iPhone AI功能有冇突破，刺激銷量再引導舜宇嘅客戶華為、小米等等喺手機鏡頭投資升級去追趕Apple，倘若新iPhone迴響如X咁一般，舜宇要重展強勢就有難度。
華虹（1347）執行能力本來遠遜上述兩股，科技股本來點數都未到佢，但中興（763）事件後，半導體成為中央迫住催谷嘅行業，長遠盈利展望進入上升周期。適逢科技龍頭轉弱，資金總要搵新出路，華虹喺反彈市初段，股價已破頂在即，似乎反映較符合市場口味。增長股不一定單純講質素上嘅分野，有時是講企業、科技發展周期嘅分別而已。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com