魚樂無窮：計好數無懼跌市
■必瘦站股息率高，可吼實回吐機會上車。
人仔波動勢頭加刻，恐慌情緒升溫，港股立即變身提款機，假期回來恒指一度跌穿28000大關，人仔貶值受累股如內房、內險、航空、紙業股尤其慘情，可謂屍橫遍野，外圍形勢一日未變，上述板塊每次反彈都係逃生門，冇貨嘅勸你唔好手多。
股票價格升跌，最基本係睇業績，盈利佳刺激股價之餘，更會推高估值，股價自然加速上升，反之亦然。睇睇近排狂洗倉的濠賭股，年初經常交靚數，股價高處未算高，但近月數據屢遜預期，支持不到高估值，市場憧憬更是幻滅，急插變得理所當然。
必瘦站股息率高
講過無數次，只要睇實倉位總值做部署，一定可以避過最恐慌時清倉的尷尬場面，呢一刻從高回落，現金充足的可以吼實強勢股操作。點樣揀強勢股？業績佳固然重要，此乃跌市脫穎而出的良方，另一重點是有高息支持，防守性提高之餘，一旦坐艇也有安慰獎（股息）收。
必瘦站（1830）周二中午發通告，指受惠無創醫學美容服務銷售額上升，截至6月底止3個月銷售合約大升43%，並預期未來季度前景仍然樂觀。集團去年已因績佳大派高息，就算撇除特別息，現價股息率仍有9.5厘，計好數吼實回吐機會上車，希望可逆風再上吧。
唐牛
http://fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.finance.appledaily.com