中環在線 - 李華華 2018年7月5日
中環在線：港人愛現兜兜
手機支付落後
■Alipay HK CEO陳婉真指折扣優惠難推動港人使用手機支付。張浚浩攝
手機支付喺內地大行其道，唔少內地企業高層都係一機旁身，冇銀紙喺身，反問華華覺唔覺得出街要拎銀紙好鬼落後。生產力促進局噚日首次公佈關於手機支付嘅調查，都證實咗香港人喺呢方面真係好鬼落後。
擔心私隱外洩
產力促進局公佈嘅「Alipay HK智慧支付普及指數」調查，訪問咗400間零售企業同1,000名15至64歲嘅市民。調查發現，過去一年市民最常用嘅8款支付渠道，現金與八達通排頭兩位，跟住就係簽卡同埋EPS，手機支付排尾三，僅高過網上付費同商店預付會員卡。
調查又發現用家對智慧支付嘅接受程度偏低，得分僅45.5，低過50分界線，主要因為唔了解相關操作，並擔心私隱外洩，而且有近五成人滿意目前嘅支付模式。
生產力促進局方面指，香港人使用手機支付嘅情況，較內地與瑞典落後，該局總經理（資訊科技）黃家偉認為，「如果香港唔做（智慧支付），就會流失部份客源。」
對於會否再燒錢做推廣，Alipay HK行政總裁陳婉真就回應話，折扣優惠明顯唔係港人使用智慧支付嘅原因，「新brand開頭可能推優惠，但消費者好精明，要易用好用先會用！」
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com