一路一帶：政府不敢用的兩條樓市辣招
■政府剛推出新房屋政策。
「娥六招」推出後，市場普遍認為新招冇料到，反而減少私樓供應，業主及準買家亦對林鄭投下不信任票，繼續追價買樓，筆者一連兩日被將軍澳區「創新高」的二手成交淹沒，其實取較為公平及抑壓樓價的方法，有兩招，但政府未必夠膽去用。
第一招
，從供應著手，政府今次將多幅土地收起，不再交給地產商發展，留來給房委會等公營機構自己起自己賣，有部份起公屋，亦有部份起超平價居屋。筆者身邊很多朋友抱怨，政府對居屋補貼太多，但樓價不停破頂，得益的只有抽中籤，買到居屋的幸運兒，香港高薪一族卻白白交稅，助養一班居屋人士。這是觀點與角度的問題，白居二市場，抽中居屋的幸運兒在補地價前，只能賣給綠表人士，買居屋的用家，等如筆者上周提及過的「共產房」買家，靠政府補貼上車，但賣樓收益，某程度上要跟政府共享，即賺價無私樓業主咁多。
不過買樓最賺錢的，是因為有槓桿效應，居屋業主，較其他人有較低成本及低風險上車，著數肯定有，但未必係最甜。其實大部分居屋買家，都是自住用家，用家換樓，都是想換個較好的居住環境，或者細屋搬大屋，反正未補地價就唔租得出去，其實新居屋，應該採用像「首置上車盤」或「置安心」等較嚴厲的轉售政策，十年禁售期都太短了，廿年夠未？等買家安心上車吧，反正好似煥燃壹居等資助性房屋，其實都係富裕家族，買給子女的平價玩具，點解要益有錢人？製造更大的貧富懸殊？林鄭喺記者會講過一句，「有人話買樓係一生最大投資」，唔應該有太多限制，但另一面卻說安居是首要工作，摑完咗一巴，又摑右邊一巴，其實真正搶奪政府補貼，就是無自住需求的投資者，延長禁售，係簡單真接嘅做法。
另一招，從需求落手，就係加大BSD，對海外人士出限購令。大陸的達官貴人，當咗香港係避風港，買香港樓等如買保險，萬一被抄家，被雙規，仲有香港樓做保障，發展商將偽豪宅包裝，天價出售給大陸人，用招標方式，趕絕香港買家，就算有空置稅又點？囤盤最多的發展商，今日又將元朗新盤招標推售，一間一間慢慢賣。大陸人目前只需交樓價30%辣稅就買到香港保險樓，其實加到50%仍不足夠，最好加到100%，甚至200%，睇嚇發展商仲點招標！
斯郎
斯郎
一路一帶 - 斯郎 舊文
來源 source: http://hk.finance.appledaily.com