【實力取勝】唔賭大市賭細股（陳承龍）（第184期）
2018-7-5 16:00:51
啱啱同屋企人去咗轉日本鹿兒島，雖然要使啲錢，但同屋企人玩真係好開心又減壓，二來亦都避咗開大跌嗰幾日，少做少錯，一來一回計，其實可能賺咗。小弟一返到香港，又回到作戰狀態，開筆寫稿，鹿兒島好唔好玩就
等喺直播節目講啦，講返個市啦。
正如我上期所講，大家要做「格仔龍」，大市氣氛真係差，想玩都係要穩守突擊，只宜搏反彈，不宜大注。因為如果恒生指數真係穿咗27500點，下個位就睇24000點。之不過唔好被個恒指呃到，跌嘅主力都係內險同內銀，反而中細價股都幾靚，就好似前幾日被個fans鬧嘅中化化肥（00297.HK）同埋隻亨得利（03389.HK），近排縮成交後又回升，走勢都唔錯，唔排除好多資金會避開大價股，轉玩細股。
我明白大家點諗嘅，但同時要睇清楚大環境，依家係市況不就，即使之前介紹過的銀建國際（00171.HK）、歡喜傳媒（01003.HK）有好消息，也不敵大市，冇反應之餘，還要跌，所以現在我覺得大家要做好風險管理，量力而為，寧願等有勢再衝過，即使係炒細價股，都要有勢先好跟。實不相瞞，小弟就仲有好多貨，但冇乜孖展，全部安全倉，一於等有勢先大注加X佢，依家玩少陣唔會蝕底，但強調，唔係一股不留，貨底要有。
阿正啲基金界朋友就悲觀啲，佢哋睇大市跌到聖誕節左右，會去到23000點，理由係炒家用咗10個月炒高，由33400左右開始，用返10個月派貨，令大家喺呢20個月入面，好似發咗一場夢咁樣。呢個基金經理睇騰訊（00700.HK）睇到極淡，話308蚊左右先好考慮，小弟心諗有冇咁誇呀。講真呢，基金都睇到咁淡，唔通真係提你沽貨、到低位先買過咩，大家都係炒咗咁多年股，明啦，所以後市大風大浪之餘，大家要保持戰意，反彈、扭跌為升可能喺不經不覺之間發生，但喺未確定轉勢之前，唔好同個市搏老命呀！
實力取勝 - 陳承龍 舊文
來源 source: http://www.winmoney.hk