收市閒情：居屋重新攪珠公平咩
■林鄭上周推出「娥六招」。
林鄭推出「娥六招」，將居屋同市價脫鈎，又將九幅私樓地改建公營房屋，對於一眾睇唔到上車希望嘅無殼蝸牛來講，的確帶來一線曙光嘅。咪住！點解呢線曙光咁熟口面嘅，隻色咁似馬會隻藍色，仲有聲嘅，係六合彩主題曲（歌名叫《Inkpot》，係
由荷蘭樂隊Shocking Blue創作）！冇錯，對大家來講，每一次居屋攪珠，就好似多咗一次買六合彩嘅機會！
「娥六招」大家集中討論新政策係好正常，但我個人比較麻煩，我鍾意回帶嘅。原先6月13日會有新一期居屋攪珠，但突然又話數錯表，所以要延期；啱啱遇著剛剛，林鄭就喺七一前公佈「娥六招」，結果係上次入表嘅人士，份表仍然有效，仲可以用新折扣價去買㖭；不過，政府會喺10月再接受申請，新表舊表，大家11月一次過攪珠！
問題嚟啦，公唔公平先！今期居屋推4,431個單位，以15.2萬份申請表去計，即係最少34人爭一個單位，中獎機會率只係2.921513%，總之就好低啦。現在容許新申請者加入幸運大抽獎，變相原先唔夠3%嘅機會率將更低，政府仲話預會收總共超過20萬張表，既係最少45個人爭一個單位，咁多人爭，點抽？
呢15.2萬表，喺入表時係預期用7折買樓，對呢班人來講，就算你7折同52折佢都係會想買，你實在不能排除當中有人係，「我寧願你畀返個七折價我，還我一個高啲機會率！」講真，對所有人來講，抽唔中嘅，你平到一折都冇意思啦。
當然，政府今次點解會數錯表咁「唔小心」，咁梗係有佢原因，估計係佢一方面又怕，如果如期攪珠，然後短時間內公佈新折扣，用七折畀班幸運兒又俾人嘈，用新折扣畀佢哋，冇抽嘅人又反枱！於是索性認衰仔囉「Sorry，我有做錯到！不如大家一齊企呢個新Pool，新折扣齊齊享，有居屋齊齊抽啦！」咁樣，策略上來講，理論上反對嘅聲音點都少啲嘅，畢竟政府大方向係，要令香港人唔好搞事，唔好遊行，所以先解決居住問題。
千頌C
http://fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.finance.appledaily.com