財經評論：自己安老自己砌
■公共年金可解決部份中層長者安老需要。
全民退保落空，去年初政府便提出將長者資產轉化為每月穩定「出糧」的公共年金，計劃本月中出台，接受年滿65歲銀髮族登記。年金內部回報率達4厘，連贊成全民退保方案但被娥特激壞的港大榮休教授周永新，都同意「自製長糧」回報，對不懂投資的長者算
係賣大包具吸引力。
不過年金計劃屬專線小巴，啱搭呢架綠van嘅乘客，要有啲資產唔算富貴但又非無產可依的中層人士，好有錢同「真．中產」嘅唔駛吼你，得幾十萬積蓄就唔夠本製作可安享晚年的長糧。
有分析指，按當局一條龍政策構思，年金最good fit對象，估計係有間類似5、600萬細價樓適宜做安老按揭（高價樓超安老按揭上限，業主寧願加按套現買多間細屋或用來炒股），配合埋65歲後提取強積金（MPF）累計權益，加埋本身積蓄夠二百零萬身家嘅中產老友記。
假設佢哋將資產組合一半（如100萬元）拎去投保年金，並達上限額，抵押埋物業做安老按揭，咁單人計，每月可搞到萬幾蚊自製長糧收入，貼近人均收入中位數，政府一家便宜兩家著，對這批中產長者社福責任，唔駛上膊孭咁多。
香港人口老化，安老制度唔完備，2000年底實施既MPF，截至去年底總資產值為8,435億元，每名計劃成員平均資產僅約20萬元，去年計香港人均壽命，男、女性分別為81.32及87.34歲。
年金任務之一，其實係接65歲長者只提取到雞碎咁多MPF，之後仲有好長生計要解決呢枝火棒，政府擔心佢哋攞住有限MPF老本，條條揈使咗去或者投資失誤被人呃咗，最終要返政府度尋求社福支援；風險低回報佳的年金，若加埋安老按揭就滿足到長者穩定出糧需要。
近期勞福局提及放寬年金投保者，可合資格申請高額長者生活津貼（高額長生津）案例，一個有60萬元資產銀髮族，將六分之五撥咗去投保年金後剩餘10萬元資產，就符合申請高額長生津門檻（單人資產上限14.6萬元），老友記兩者兼得每月落袋6,385元。
口痕友話，呢個年金疑似點石成金showcase，諗深一層其實係紙上個案。長者要撥走組合內逾8成資產，鎖死落年金投保，根本唔符合銀行界建議，要保持一半組合為流動資產的安全線；長者要投保又符合高額長生津申請，資產鍊乾鍊淨得十幾萬，65歲人唔通唔駛閒錢旁身？所以個案都係理論成份居多。
歐美日等先進國家早設有公共年金，香港起步遲，當然有好過無，但老有所養弱有所扶，係一個成熟政府走唔甩嘅責任，年金可解決部份中層長者安老需要，惟無殼基層老友記依然唔會受惠。
記者：劉美儀
財經評論 舊文
來源 source: http://hk.finance.appledaily.com