金手指：向林偉駿致敬！
■林偉駿搞嘅阿信屋，應該係近十年香港最大嘅奇蹟。 資料圖片
好多年前，孫柏文同火燎森喺商台主持一個叫「星火燎原」。有日，火兄就提議講佢啱啱幫親過嘅一間新零食店。產品好特別，又平。間嘢嘅名？759阿信屋。
當時，阿信屋分店數目唔過十間，連母公司CEC（759）嘅
年報，都係用咗幾十字去交代營運情況。我哋係全港第一間傳媒訪問老闆林偉駿。
仲記得，當林老闆答完我點搞供應鏈控制，點即時知咩賣得，訂貨又點反應時。我預言話：「你隊IT一定遲早俾人瘋狂挖角。」幾年後再訪問佢，佢都突然間話：「老孫，你記唔記得你個預言？」我尷尬答：「我日日都好多預言，未必記得曬。」佢笑住答：「你話過我隊IT會被瘋狂挖角。真係不幸言中。」
林老闆搞嘅阿信屋，應該係近十年香港最大嘅奇蹟。唔係齋話分店數目、營業額等，而係喺一片學者、左膠、大律師話超級市場壟斷係冇可能有自由市場解決方法嘅咆哮聲中，殺出今時今日連柴米油鹽都賣嘅阿信屋，令該行業出現遍地開花嘅景象。今日，已再聽唔到班抽水王出來話得惠康、百佳。
不過，我對CEC嘅前景，係憂心。因之前分散咗注意力，搞散咗個brand。我哋香港人覺最可惜嘅，就係好期待林老闆將阿信屋重振旗鼓，再闖高峯。因阿信屋嘅核心賣點，係不斷試賣新嘢，即係會好多時賣錯嘢。林老闆去咗，內部有冇人可揸旗後有勇氣不斷試錯？喺填鴨式教育出來嘅幾代，唔使孭鑊係常識啊。希望CEC掂。
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com