【財演算法】日常炒股嘅盲點（蔡嘉民）
2018-8-21 8:00:27
上期專欄提到點解美國個指數會表現得咁好，長年累積落黎平均年回報有成10%，連股神巴菲特都夠膽同對沖基金大佬對賭，話基準指數(Benchmark index)一定會跑贏對沖基金。唔通係因為對沖基金好廢？其實
魔鬼存在於細節中，從中作梗嘅其實就係Survivorship bias，即係倖存者偏差。
就好似恆生指數咁，好多製作指數嘅團隊定期都會為指數成分股重新審視，睇下有啲咩要加入或者踢走，做俗稱換馬嘅動作。而美國嘅基準指數都會做呢啲替換嘅動作，佢地每次加入嘅都係一啲短期表現好好嘅股票，每次踢走嘅都係表現差嘅公司。所以長年累月以來，標普500指數入面都係地表最強嘅500間公司，所以佢地優秀嘅股價表現就會令到標普500指數嘅走勢靚靚仔仔，唔洗失禮，而走勢核突嘅股票已經消失得無影無蹤。
其實呢一個現象都存在於我地身邊，成日聽倒身邊啲人炒野好勁，咩一個月賺幾十Percent，甚至真人真事聽過有人話佢一年賺10倍。嗰一刻當然留名跟進啦，可惜一年後已經無左佢消息。點解身邊個個都咁勁呢，係咪真係自己特別廢呢？又係Survivorship Bias喺度作祟，因為佢地賺錢先會跳出黎講，仲要賺得愈多錢嗰啲，嗌得最大聲，而輸錢嗰啲就自動消失，所以先會形成呢個現象。
所以，我地做Backtest嗰陣，千其唔好俾自己個測試出現呢個Bias，即係測試策略嗰陣，唔好有意無意咁喺測試之後，望倒結果之後，拎走表現唔好嘅測試結果。特別好似之前舉嘅死亡交叉例子咁，唔可以拎走失效嘅死亡交叉，然後話死亡交叉威力無窮。
財演算法 - 蔡嘉民 舊文
來源 source: http://www.winmoney.hk