智取大市：後市寧吼周期股 - 晉佳
中國東方之前發過盈喜，股價近高位仍算強，兼具鋼鐵及內房概念，估值甚低。 互聯網圖片
上星期洗倉潮，各個熱門板塊都以意料之外嘅幅度去急跌。星期一國家隊入市頂住藍籌股，大家由恐慌冷靜過來，計一計數之後發現熱門板塊跌得太多，於是極速反彈，例如一眾藥股業績唔
差，反彈幅度更快。
熱門板塊如手機股、教育股、生物科技股，本身有唔同壞消息纏繞，反彈一日起兩日止，完結後，特價時段已過，加上有排未等到呢批股份基本因素回升，有可能浮浮沉沉。
增長股強到今年6、7月，8月先嚟洗倉，噚日先嚟急彈，雖然高低位跌幅達五成，但一眾周期股，其實由2月開始跌到近排未好過，如貴金屬股、航空股高位都一樣跌超過五成甚至更多。大陸更積極財政政策，個別板塊受惠，嚟緊港股周期性反而更易搵機會。
周期股當中，因應唔同行業、公司發展周期，都有強弱勢之分，例如水泥股較強，鋼鐵股亦偏向硬淨，再細分啲，又有個別股份能夠跑贏同業，呢類精英周期股，可能有驚喜表現。之前發過盈喜嘅中國東方（581），雖然喺港股大反彈之中，升得特別少，但股價近高位仍算強，鋼鐵加內房概念，估值甚低，究竟有幾低？相信月尾業績自有分曉。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com