收市閒情：熱血初創也有變質時 - 千頌C
Startup可以成功，橋唔係最緊要，有好嘅團隊先係動力！ 資料圖片
好多時一間公司，或者Startup成功跑出，背後都係一個又一個熱血嘅故事！故事通常都係創辦人，搵來一班有心兼對佢有信心嘅同事，日日圍埋度橋仲諗Execute，結果成功搵到第
一單生意、第一宗投資、第一桶金，然後公司變大……越來越大，然後你以為一眾開國功臣可以論功行賞，分封諸侯？
事實係，唔少Startup一成功擴充，「Well……我哋𠵱家係international公司，當然要啲international嘅talent，係時候出去搵啲經驗老到，人生有經歷嘅高層坐陣！最緊要係咩？梗係出去Pitch investor時，個Mangement team睇落好勁！」要睇落好勁，咪去啲大公司高薪挖角，然後悄然空降，當然要畀佢哋獨攬大權話曬事。
結果事情變質了！原本幫佢哋開山劈石、最了解公司運作嘅開朝元老，上面無啦啦空降多個「外援老細」。遇著個叻嘅，都仲可以相安無事；遇著嘅忌才嘅呢，咁就GG了：當元老想搞campaign？外援會話「NO！你嘥錢！」當個campaign有數返，外援就會同人講「都一早話咗要聽我咁做啦」。總之，元老想做嘢？唔畀！有功？梗係認咗先！
Startup可以成功，橋唔係最緊要，有好嘅團隊先係動力！不過，當一間公司發圍，外表有品牌有光環，但內部運作係，有心做嘢嘅做唔到嘢，有心玩嘢嘅大權在握，唔做實事，只搞辦公室政治。沒有最初嘅熱血，光環仲可以維持幾耐？
後記：講到變，阿信屋老闆林偉駿最叻就係變。由做線圈生意，變做零食店；行家玩封殺，變陣日本直送。業務再變，但林偉駿敢於求變嘅本質，從來都沒有變。作為一個廠佬，佢要轉型時從來沒有包袱；作為一個上市公司老闆，對住記者們，說話從來坦蕩真心無變質。林偉駿先生，多謝您一直以來的幫助；以及為香港零售界寫下一頁歷史。願安息。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.finance.appledaily.com