特朗普口術壓利息
2018年08月22日
市場靜待美國與中國重開貿易談判，事前雙方都各自控制期望。美國總統特朗普預告對達成協議不抱太高期望之餘，又批評中國推低人民幣匯價。中國對談判極低調處理，習主席放完假着軍裝亮相，擺出強硬姿態。雖然中美齊齊為談判做期望管理，但人民幣匯價
在會前煞停跌勢兼反彈，內地股市都喺疑似國家隊維穩下回升，反映北京似乎為了會議做定準備工夫。
特朗普在講貿戰之餘，繼續出口術向聯儲局主席鮑威爾施壓，佢喺接受媒體訪問時話，美國正與其他國家進行非常強力磋商，「我們會取得勝利，但在這段期間，我應該要得到聯儲局一些協助，因其他國家都提供這種支持」，暗示北京以人民幣貶值對沖加關稅影響。他再炮轟鮑威爾，表示對聯儲局加息「不感到興奮」。
東方海外急跌恐未見底
另外，媒體又傳聞特朗普私下對支持者批評鮑威爾，大呻自己在顧問建議下信錯人，以為鮑威爾係利率鴿派，點知佢上任後就支持加息。特朗普對息口發言，令到美元匯價稍為回軟，美匯指數跌0.2%至95.902點。雖然美國總統無權決定利息，甚至不應干預聯儲局決策，但行事一向不依常規的特朗普就有理無理，明示暗示要壓低息口。雖然佢咁出口術無法定權力，但對鮑威爾同埋市場對利率預期，點都會產生心理影響。
隔晚美股再升，加上特朗普出口術壓低美元美息，人民幣再反彈，內地股市上升，港股高開72點後，雖然一度倒跌71點，但守得住27500點；恒指喺A股帶動下重拾升勢，收報27752點，升154點。藍籌個別發展，騰訊(700) 先升後跌0.06%，收報350.6元；舜宇光學(2382) 急升9%，收報94.7元；石藥集團(1093) 急漲10%，收報19.58元；吉利汽車(175) 上揚7%，收報16.38元。
內房股造好，碧桂園(2007) 上半年純利129.4億元人民幣，按年增長72.5%，每股盈利60.03分，中期息派18.52分，按年大增77.4%。公佈後股價造好，收報12.24元，升8%。宣佈派特別息的中國恒大(3333) 升1.4%，收報28.4元。
中美貿易談判對航運股不利影響，喺呢個大氣候下，老牌航運股東方海外(316) 插個不停，午後跌幅進一步擴大，曾低見47.05元，再瀉17%，收報48.7元，仍跌14.1%。有中環茶友笑言，由於東方海外跌得咁急，有人心思思博反彈，但佢認為東方海外下跌有特別原因，所以想燒冷灶揸佢就要小心。
茶友話，東方海外早前高價賣股，股東成為大贏家，皆因今年特朗普攪局，大股東及時甩手賣咗股權畀中資套現，避過咗一劫。東方海外成為國家隊，原有股東紛紛接受收購離場，但買家想保持上市地位，所以快手快腳將部份股權配售番出街。由於流通量增加，所以股價一復牌即大插，有啲不知就裏的股民就可能想「低撈」。
東方海外賣盤價係78.68元，呢個係超高價，公司股價從來無去到過呢個水平，喺未公佈收購前，東方海外長期喺40、50元水平，睇番航運股普遍喺過去一年下插，創咗新低，如果無收購，東方海外股價可能只係20、30元水平。茶友話，航運股另一個不利影響係全球收緊環保要求，航運公司要更換船隊，投資需求好大，成為投入大、回報低的行業，所以大股東先會賣盤，中資現時喺航運市場份額好大，從國家大戰略加埋其他因素考慮提出收購，但作為股份投資就好唔吸引，所以從正路睇，佢48.7元的股價「錢途似咁」，市盈率28.3倍依然好貴，博反彈好易就中伏。
買冷門股要做足功課 而且仲要掌握時間，好似剛剛公佈業績的亞太衛星(1045) ，中期盈利2.8億元，按年增16%；每股盈利30仙，中期息派4仙。早前同行亞洲衛星(1135) 中期盈利都增長近兩成，股價即時急彈。早前陸羽仁有提過衛星股市盈率低，O依家兩間公司公佈出來的業績都算平穩，比預期略佳。亞洲衛星市場有點供過於求，令租用衛星價格有壓力，所以衛星股過去一年股價唔太靚仔。亞太衛星業不跌反升，令人有啲驚喜，主要係因為佢增加咗轉播能力，同部份客戶租用服務由「標清」升級為「高清」有關。業績公佈後佢股價雖然彈升咗近兩成，但市盈率都係五倍左右，息率有六厘。由於區內衛星租金仍然有下調壓力，公司營運仍以薄利多銷為主，所以估值唔可以好高，呢啲股票憧憬少，但勝在派息高，所以入貨價要平，不宜高追，有平貨在手高位食吓胡，低位又撈來收息，咁做息魔其實都唔錯。
陸羽仁
金融High Tea 舊文
來源 source: http://hdfin.stheadline.com