中環在線：白武士敘福樓打救永華麵家
■永華麵家原址已租出，將會搵新舖重新開張。
香港老舖小店買少見少，好多老字號都不敵昂貴租金而結業，不過有麝自然香，好似位於灣仔、早前宣佈將於本月底結業嘅永華麵家，獲同樣係本港老字號嘅敘福樓（1978）識英雄重英雄，收購其香港、澳門及新加坡註冊商標，
意味永華唔單止唔使執笠，仲分分鐘可以衝出香港，到澳門、星洲開分店。
打動第三代傳人教秘技
永華被評為香港五大雲吞麵家之一，於2016年獲頒米芝蓮最超值推介，招牌美食包括鮮蝦雲吞麵、南乳豬手麵、桑寄生蓮子蛋茶。敘福樓冇透露今次交易作價，但可以保留本港傳統美食，香港人又有口福，幾多錢都值得喇！
敘福樓主席黃傑龍喺facebook話，聽到有70年歷史嘅永華麵家要結業，感到太可惜，「這是100%地道的香港雲吞麵，不是廣州南下香港的，我真係好希望可以保留這個品牌，更加希望可以保留他們的傳統美食工藝」。於是搭路搵朋友介紹，「幾經努力終於誠意打動」，先得到永華麵家第三代傳人張婆婆把呢個70年招牌同傳統美食嘅製作方法全部傳授畀佢。
不過，永華麵家原址已租咗畀人，所以都係會如期結業，黃傑龍話一定會把永華麵家延續，即係會另覓地點重新開張喇。出錢又出力，難怪網民like爆，話「到時開張一定撐場」。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com