智取大市：騰訊的最大障礙
■騰訊近期連番投資手遊以外業務，但股價反映有唔少投資者質疑。圖為騰訊主席馬化騰。資料圖片
西南證券發報告，覺得小米（1080）以亞馬遜作為模板，值得預測2019年市盈率40倍，目標價30.3元。當然，小米IoT（Internet of things）概念唔差，
但要成為亞馬遜，要過阿里、騰訊（700）嗰關，甚至應該話，小米變亞馬遜根本冇可能，專注做低檔智能家居應該都夠吧。
阿里縱橫網購界，只要佢發力喺IoT、AI發展，相信佢最有條件成為一間較近似亞馬遜嘅企業，阿里呢兩年發展物流業務菜鳥，目標十分清晰，做智能零售至少贏在起跑線。
講到呢度，亦可以諗到點解騰訊股價跌。騰訊由網絡廣告以至手遊，不斷成功尋找到客流變現嘅故事，推動增長，每次被人質疑增長持續性，往往做到成績畀你睇，Track record好到爆。正當騰訊手遊增長去到大半嘅時候，近期連番投資金融、智能零售、Cloud、AI、視頻，大概令投資者諗到佢想做乜，偏偏部份定位同阿里撞到啪啪聲。中國亞馬遜咁難做，咁整嚿中國Netflix出嚟吧，視頻？似乎又唔夠百度嘅愛奇藝鬥。
當然，呢間神奇公司可以有其他大家未想像得到嘅增長出路，去支持𠵱家嘅估值，但Idea可能遠遠未到位，遠水未必救到近火。股價告訴大家，過程有唔少投資者質疑了。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com