笑到最後：博一鋪港股反彈 - 高明
恒指跌至呢個水平，博反彈係因為上星期壞消息太多。 資料圖片
港股陷入技術性熊市，由恒指1月29日高位33484點，上周五跌穿高位回落兩成的26787點，最低見26669點。喺呢個時刻，高明選擇博一鋪港股反彈。
先旨聲明，博呢鋪反彈同大家無關，純粹為
自己。高明認為騰訊（700）大股東405元沽貨一刻，已宣佈熊市來臨。既然熊市已到，博向上並無意思。但自己有個習慣，鍾意破位跟衝，今年多數摸頂收場。一旦有熊二反彈升至兩萬九之類，一定手痕高位跟衝，不如呢刻就出手，升就有順風車搭，並以輸曬作最壞打算。
事實上，博反彈係因為上星期壞消息太多。例如美國即將向中國徵收2,000億美元中國商品25%關稅之外，特朗普宣佈準備再向額外2,670億美元的中國貨徵收關稅；新興市場貨幣危機持續；中國擬向每款網絡遊戲徵收35%的專項稅，直接打擊騰訊。
另一個高明比較在意嘅消息係中國本月首次於共同申報準則（CSR）下交換金融賬戶訊息，中國將得悉於港持有大額保單的中國人身份。對友邦（1299）明顯有影響，本來係少數未穿250天線嘅大型藍籌，消息出後穿埋。
不過，咁多個危機之中，影響最細就係新興市場貨幣危機。正如高明反覆提到，只要港府起少一截高鐵，已可拯救整個阿根廷及土耳其，估計對港股影響只在情緒上。題外話，港股被資金認定為新興市場，今年一同捱沽，如果港府出手救阿根廷，不論係出於一帶一路定自身利益，都有得著，值得行政長官林鄭月娥深思。
咁多大家都知嘅因素已出現，令恒指跌至呢個水平，高明買咗先算數，博港股出現反彈，以恒指低位26669點止蝕，輸曬罷就。而呢篇文章，可能周一開市頭3小時已失效，務必留意。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.finance.appledaily.com