財路：建板下半年可turnaround - 錢雋
摩通畀建板目標價14蚊，現價要升133%。圖為建板主席張國華。資料圖片
建滔積層板（1888）短短半年插咗近60%，場內專業預測PE，得5倍超低單位數，加埋近10厘息，建板再質要兜。
建板係覆銅面板界龍頭，據顧問公司Prismark Pa
rtners報告，集團連續13年穩居全球覆銅面板市場第一位，市佔率14%。建板啱發半年成績單，純利輕微倒退近11%，到17.8億元。主打覆銅面板受原料價漲影響，分部溢利倒退6%，到22億元，非戰之罪。
建板已經由上市時800客戶，增加到1,200名，踏入下半年，覆銅面板步入銷售旺季，集團兼已經開始上調各產品售價，預期未來售價仲有提升空間。建板擴大客源，有利保障到生意，又隨住集團提價，亦有望將部份成本，轉嫁到下家，有利毛利率提升番。
呢期貿易戰，建板話呢壇嘢冇對集團有實質影響，集團兼且喺泰國增加30萬米產能，而出口到韓國同歐盟等地，仲可以獲豁免關稅。建板幾條路走，照計下半年可以turnaround。
場內專業預測，建板今、明兩年eps 1.15元同1.2元，預測PE得5.7倍同5.4倍，比建板上市以嚟平均PE8.5倍，平咗36%。仲吸引係，專業預測建板今、明兩年派息率，上到9.9厘同9.5厘，當打個七折，都講緊挨近7厘。
呢轉建板再插，質穿6蚊要兜，到時，集團中長線RSI都已經超賣，值博率仲高啲。當上番摩通畀嘅14蚊目標價，建板係要升133%，到時，建板明年預測PE12.5倍，唔算太過份。
錢雋
細價股專家
本欄逢周二刊出
財路 - 錢雋 舊文
來源 source: http://hk.finance.appledaily.com