安踏心雄想做成份股
2018年09月18日
山竹威力驚人，香港好彩提早應對，無乜人命傷亡，但特區政府有小小開心得太早，無留意到周初返工，原來又無火車又無巴士，搞到火車站大擠塞，上班族怨聲載道。今次風災造成嘅損失都唔少，好彩香港唔係咁多房產保險公司上市，而且地方始終較細，喺
金融上的影響應該唔大。
制裁又到反彈隨時完
股市繼續大吹貿易戰之風，由於美國好矛盾咁又話重開談判，又要繼續向2000億美元中國貨品徵收關稅，雖然稅率由25%調低至10%，但傳聞中國好唔高興，美國媒體話中國可能喺現階段拒絕談判。個市聽到可能傾都唔傾，即時腳軟落嚟，恒指一度下插超過500點，收市跌幅收窄至353點。雖然跌幅唔算好大，但呢個反彈浪可能已玩完，又要開始尋底之旅。
細看美國照樣對中國貨徵稅，可以有兩面解讀，本來美國照樣抽稅，談判亦未必有，睇落幾負面。但換一個角度，加稅幅度由加25%大減至10%，估計主要考慮到美國商界意見，避免徵稅過多，對稍後聖誕消費造成太大影響。對美國入口商而言，算係跌咗個橙執番個桔，股市反應因此相對溫和。現時最擔心係美國公佈徵稅名單後，中國宣佈反制措施，屆時會唔會引起連鎖效應，搞到連談判都唔能夠重開。無論如何，貿易戰開始入肉，始終係一大壞事。
喺貿戰仍有不明朗下，恒指收報26932點，急挫353點；國企指數收報10462點，急跌113點，成交只有644億元。騰訊(700) 連續反彈後急挫3.3%，收報319.2元。打風搞到要停業的銀娛(027) 下滑1.4%，收報49.15元。市場憂處iPhone XS首周末預售情況不似預期，手機股捱沽。蘋果概念股瑞聲(2018) 急瀉6%，收報77.55元，是跌幅最大藍籌股；非蘋果產業鏈的舜宇(2382) 亦挫5.3%，收報90.95元；比亞迪電子(285) 挫2.6%，收報9.52元。
弱勢板塊有醫藥股，主要係市場擔心仿制藥有降價潮。石四藥(2005) 插5%，收報6.64元；石藥(1093) 、康哲藥業(867) 、中生製藥(1177) 挫4%；三生製藥01530)及金斯瑞(1548) 跌逾3%。
昨日跌市中體育用品股受壓較明顯，特步國際(1368) 急插11%，收報4.27元，反映市場對中國內需股看法審慎。喺呢個時候，內地龍頭體育股安踏(2020) 出招，宣佈有意再收購海外運動品牌，芬蘭體育用品商Amer Sports，看來係有意藉此做大做強，為晉身成份股博一鋪。
Amer Sports早前披露，根據安踏提出的無約束力初步意向書，擬以現金代價每股40歐羅，收購該公司全部股權，涉資達47億歐羅(約427億港元)。該公司表示，目前尚未與安踏進行任何談判，但消息刺激該公司股價一度飆升三成，其後升幅收窄。
安踏體育近年發展有超越老大哥李寧(2331) 之勢，目前市值達922億元，較早前更傳有望獲納入恒指成份股。安踏現時手頭銀彈充足，併購能力不弱，加上2009年買入意大利高端運動品牌FILA，在大中華地區的商標使用權和運營權後，生意做得唔錯，形成與本身品牌有互補作用。
現時安踏主品牌門店，主要開設在中國二線及以下城市，外國品牌則主打高檔市場，以FILA為最主要構成的其他品牌，喺2018年第二季度零售表現，同2017年第二季度比，按年錄得90至95%升幅，所以公司心雄再重錘出擊。但消息公佈後安踏股價跌3.5%，收報34.35元。歐洲公司股價一向唔平，加上市場情緒傾向保守，覺得內需股前景不明朗，對進取策略唔係咁欣賞，所以併購消息起唔到刺激作用。
陸羽仁
金融High Tea 舊文
來源 source: http://hdfin.stheadline.com