魚樂無窮：賭股果然識計數 - 唐牛
澳門賭場因風災而歷史性暫停營業，表面對賭收有負面影響，實際贏得印象分兼掌聲，效益更大。 資料圖片
山竹快來快去，怨氣卻未有吹散，更是越積越勁。全港交通大混亂，打工仔有工返不得，時間全浪費在等一班唔知幾時開出的車，怒火中燒好正常。
實際啲諗，街道上滿
佈樹木、玻璃、招牌等雜物，打工仔上班要左閃右避，舉步維艱。同一時間，工作人員卻要趕緊善後，你阻我時我又阻你，經濟效益只會更低，咁簡單嘅道理都諗唔通，天災定人禍恐怖，大家心中有數。
風災期間，澳門賭場因應員工、旅客的安全情況，歷史性暫停營業，計死數的大行，當然第一時間跳出來，話對賭收有負面影響，要調低整月增長雲雲。但這些是否事實之全部呢？不妨從另一角度出發︰去年颱風天鴿來襲，令澳門滿目瘡痍，且死傷嚴重，今次山竹威力比天鴿更勁，當局嚴陣以待，如果賭場堅持開業，要荷官們冒住生命危險返工，豈非與政府對著幹？
眾所周知，賭場賭牌將於兩年後陸續到期，結果係點仍屬未知之數，但可以肯定的是，唔聽話嘅一定會扣印象分，無怪乎賭場全線響應澳門政府呼籲，向居民開放近3,000個私家車車位，完美贏得掌聲，還未計其他救災工作。你話喇，少抽一日半日百家樂傭，效益係咪好大先？
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.finance.appledaily.com