【財演算法】量化波幅指數異象 揭示大跌時機（蔡嘉民）
2018-9-28 11:17:21
對於廣大炒家黎講，炒股票最難唔係係牛市賺錢，而喺成功避開跌市同熊市先係最難嘅地方。基本上如果可以預先捕捉倒調整的話，All in啲指數ETF，一路喺升浪之中坐住，然後係大跌前平倉，就已經
好唔錯，完全可以跑贏大市，跑贏唔少專業嘅基金經理。問題係，點樣搵出大啲大跌前嘅啟示。喺之前嘅文章其實都曾經提過一啲嘅股災指標，大部分係啲宏觀經濟嘅指標，可以揭示經濟前景同埋公司嘅穩健程度。但係數據更新嘅頻率唔高，可能一星期一次。而最近喺唔少新聞度都見倒有提及波幅指數嘅異象。
平時大市上升嘅時候，波幅指數會有下跌嘅慣性，而大市大跌時，波幅指數就會抽升，所以有唔少人都叫波幅指數做恐怖指數。但有時候，即使大市上升，波幅指數都可以企硬，不跌反升，造成異象。有指呢個異象通常係大跌市之前出現。原因係，波幅指數係計算啲炒家對期權嘅需求。如果炒家覺得波幅會擴大，就會買入兩邊期權，從而托高波幅指數。升市之中，波幅指數上升有機會顯示炒家嘅不安。
但其實好多媒體都無指出點樣定義呢種異象，點計算呢種異象，點樣為之大跌嘅前夕。純粹睇完新聞就走去賣左啲股票並唔係一個理智嘅做法。當然拎歷史數據做下回測先係正確做法。
要介定異象之前，首先要睇下平時大市嘅走勢同波幅指數走勢之間嘅關係，最方便嘅係做一做迴歸分析(Regression analysis)。跟住就可以運用公式去計算每個交易日波幅指數同理論變化嘅差距，從而睇下一段時間之內，波幅指數不尋常咁變動嘅日子有幾多。當不尋常日子嘅數目不尋常地多嘅時候，就係做長倉嘅投資者需要警惕嘅時候了。
下回續。
財演算法 - 蔡嘉民 舊文
來源 source: http://www.winmoney.hk