笑到最後：騰訊最危險的情況 - 高明
對騰訊嚟講，最危險唔係手遊市場增長放緩，而係會否被官方培植嘅另一個集團取代。
資料圖片
2017年被稱為散戶冇份參與的牛市，皆因升幅來源，只係嚟自騰訊（700）、平保（2318）、瑞聲（2018）、舜宇（2382），以及至尾段才加入嘅內銀同港交
所（388）。調查顯示，2017年只有一成人跑贏大市。
無啦啦回帶講呢段「歷史」，係因為最近睇報道發現，原來香港好多人靜靜雞大手買咗騰訊，覆蓋廣泛嘅程度，雖然不如當年嘅滙控（005），但身邊總會有人有買，並且總有人由高位持貨至今堅信神話不滅。
奇怪嘅係，2017年係咪冇位入騰訊？實際上，上半年都經歷幾個坐成個月停滯不前嘅月份，不過，又好似冇乜人買，真正股價行得快係10月打後嘅事，到高明第一次聽散戶大舉出擊，係2017年12月，首次跌穿400蚊，最多人買應係今年一月創新高後反覆上落嘅一段。
如果大家舊年有聽過高明電台節目，應知高明以騰訊及平保做膽，題材極窄，但慘得過佢哋又升。至今年二月小股災，其實都仲猶豫緊去留問題，一直到大股東以405元均價賣股，連最固執嘅投資者都喺夾萬拎啲股出嚟賣，心諗至少呢一浪已升完，平過大股東價都照放。
事後睇返，今日騰訊比當日想像情況更差，唔止係投機放貨導致股價下跌，更重要係雙馬被狙擊，由股票變成政治事件。對騰訊嚟講，最危險唔係手遊市場增長放緩，而係會否被官方培植嘅另一個集團取代。即使未必成真，股價亦要反映至衰到貼地後，才會令市場醒覺沽錯咗。
所以投資最無癮係成個牛市冇份參與，到熊市來臨就全程硬食，下次牛市比較好嘅做法係：一、舊年升嗰陣一早應要買，有份贏，輸時都只係回啲畀佢；二、升時冇份贏，跌都唔買。不過，如果講得出就一定做得到，股票市場發展幾百年到今日，就唔會一直都存在牛熊啦。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.finance.appledaily.com