異動空間 - 魏力 2018年10月26日
異動空間：攬炒結局漸成真 - 魏力
特朗普若無得從民生政績搶分，勢必對外加強攻擊對手，以免連忠實粉絲的選票也流失掉。資料圖片 適中字型 較大字型
中期選舉前夕，美股展開追跌之旅，將股市當政績的「侵侵」，惟有繼續喪鬧聯儲局鮑威爾發洩，連「後悔委任佢做主席」呢句都講埋出口。之但係，說話去到咁盡，通常代表唔會炒佢，最有可能係鮑威爾覺得無癮自己遞信走。
特朗普係咁搵出氣袋，一來轉移視線，二來美企第三季業績顯示，貿戰正令通脹加快升溫，例如向鋁材徵收關稅，已令Caterpillar生產成本急升；3M亦表示明年將加價4%，意味會將成本轉嫁消費者。每間都加少少價，件事就好嚴重，通脹猛於虎，加息壓力更大，美金強又進一步影響出口。去到呢個位，「殺敵一萬、自損八千」的情況終於成真。
攬炒指數急升，會否令特朗普轉軚唔再四圍「挑機」？睇落唔會。目前民調顯示，民主黨可重奪眾議院多數席位，這將令施政更困難（例如減稅2.0）。「侵侵」無得從民生政績搶分，勢必對外加強攻擊對手，以免連忠實粉絲的選票也流失掉；假如共和黨力保兩院控制權，代表選民撐佢，日後勢必有恃無恐。橫睇豎睇，未來兩年都係難捱。
港股方面，周一還在26200，噚日已跌至24600，牛仔重貨區近乎清曬，加上又近期結，淡友趁機食糊轉倉機會較大，期結前回補下跌裂口，重上25200的機會不容忽視。
魏力
http://fb.com/2012jason
本欄逢周一、五刊出
異動空間 - 魏力 舊文
來源 source: http://hk.finance.appledaily.com