跌跌不休 限米煮飯
2018年10月26日
美股前晚大插，喺科技股急跌下，杜指大瀉608點，港股開市好快唔見600點，跟住跌幅收窄，跌255點收場，以今年港股一貫弱勢而言，跌幅算係溫和，主要係內地A股唔肯跌落去，產生一定支撐作用。
商品大王沽美股買A股
華爾街股市風高浪急，亞太股市全面波動，
日經平均指數昨早低開逾400點後，跌幅持續擴大，收報21268點，跌822點或3.72%，是3月29日以來最大跌幅。港股低開後好快大插，但中午後內地股市回穩，上證指先跌後升，2600關失而復得，收報2603點，升唔夠1點；深成指數收報7529點，跌15點。市傳國家隊入市買內房股，雖然消息未能證實，但從內地股市走勢嚟睇，甚有阿爺救市味道。
呢排A股探底，中央出手力挺經濟，有「商品大王」之稱的羅傑斯，喺內地出席一個投資論壇時就透露，美國股市已經無任何投資機會，自己不再持有任何美股，反而對中國市場具信心，看好內地股市，更透露自己現已持有A股。羅傑斯一向都有點中國大好友色彩，像他這類大戶，行動經常走喺市場之前，他的分析可以參考，但幾時跟佢行動，就要睇番本身手頭投資狀況。
A股撐住，有利港股減低震盪，恒指上午急插後，下午跌幅顯著縮窄，收報24994點，跌255點；國企指數收報10176點，跌49點，成交金額1061億元。美國科技股唔得，股王騰訊(700) 難逃壓力，跌2.5%，收報269元。手機設備股舜宇光學(2382) 瀉7.7%，收報72.45元。恒指再創去年5月後低位，而全日沽空金額就有170億元，沽空比率16.1%，夜期繼續低水。
另一邊廂，人民幣匯價持續弱勢，中國外匯交易中心公佈，人民幣兌美元即期收跌97點子，報6.9498兌1美元，創去年1月3日以來新低。投資者現時個個採取觀望態度，心態脆弱。美國距離中選唔夠兩個星期，估計美國總統特朗普同華盛頓官員，唔會坐視華爾街拋風，所以短線買賣無論造好造淡，都要預咗市況波動。
10月股市跌跌不休，逐個板塊輪流下插，高估值股份好似科網股不斷探底，傳統板塊好似內房又輪流下跌。美股FAANG全面回調，本地科網股同手機設備股再插。有中環茶友慨歎個市級級向下，短炒反彈唔係咁易捉準水位，所以基本上係無得玩。
茶友之言講出投資者今年處境，因為大市不是直插而下，個市不時有壞消息，壞消息中又有啲好消息，彈完再跌，但指數整體向下，不斷消耗購買力同買家意志。早前陸羽仁建議過用限米煮限飯策略度過呢啲市況，除非手頭有大把彈藥想加倉，否則就掉轉來炒，先高沽後回補，逐步減低手頭股份成本。呢個玩法好難賺到乜大錢，最大好處係可以保持市場觸覺，又唔使受不斷下跌的市況綁住送出太平洋。
指數創近年新低，好多股份破底，當中較特別係隻國泰(293) 。公司爆出洩漏客戶紀錄的新聞，股價受嚇一度穿底，跌破10元大關，最低見過9.9元，收市報10.22元，回落3.7%。
死揸國泰買咗教訓
最近一、兩年，陸羽仁都少講國泰，主要係覺得集團經營環境面對範式轉移，面對低成本內地航空公司掟錢加入競爭，佢有排調整，所以認定佢無乜「錢途」，建議投資者不宜沾手或換馬。睇番過去三年，國泰股份有波幅無升幅，就算係大市升到33000點的美好日子，佢股價都未能突破，所以買咗佢的投資者，基本上錯失咗成個升市循環。
呢次佢爆出洩漏客戶私隱，而且仲遲咗差不多半年才公佈，呢場風波恐怕都有手尾跟，暫時雖然對公司經營未必會造成好大衝擊，但對形象損害就好大。國泰過去予人優質服務形象，收費比同行可以有溢價，但近年公司員工權益高漲，對客戶服務水平回落，最慘仲不時喺網上流傳機組人員對客戶的負評，你話班客點會覺得順氣。公司文化的改變，以及在形象推廣上乏力，對服務行業影響好大，加埋今次事件，管理層真係應該好好反省。
有人幾年前因貪平買國泰，以至錯失牛市賺錢機會，可以總結一個教訓，就係投資要考慮入市時機，又要考慮揀股技巧。入市時機唔好，買到好股都會賺少咗；入市時機好，買唔到好股，收穫一樣大打折扣，甚至可能人賺你蝕，要兩樣都扑中，先至可以贏盡升浪。如果無呢個把握，咁就不妨只買指數基金，睇少一瓣，有時效果反而仲好。
陸羽仁
金融High Tea 舊文
來源 source: http://hdfin.stheadline.com