笑到最後 - 高明 2018年11月5日
笑到最後：一粒數主導後市 - 高明
明年2月失業率數字最關鍵：如果破4%即有如海嘯重演；如果到時冇事，即係影響不大。 資料圖片 適中字型 較大字型
上周五恒指大升，原因係先有特朗普喺Twitter話同習近平通電，再加上交易時段傳出中美會喺G20峯會上達成貿易協議。收市後，CNBC記者引述白宮高層否認達成貿易協議嘅報道，夜期收市即插626點；其後特朗普再話同中國貿易磋商有好大進展，「黑期」跌少咗約200點。
同樣嘅招數，過去一年已見過無數次，首先叫你一聲大哥，私底下又係朋友；然後自行宣佈制裁行動；生效前不斷透過Twitter同傳媒放風講有彎轉；最後推出政策兼再加碼。可以預期，除非特朗普改變外交政策，否則只會反覆出現。
特朗普刻意胡亂發放消息，好似行軍打仗咁日日話和談，但係軍隊已攻入首都。部份華文傳媒喺首階段關稅生效後仍稱係口水戰，可見戰略成功。
一般散戶，應遠離特朗普Twitter，以三個簡單指標：股市、樓市及失業率作判斷。第一度防線股市係反應最快嘅指標，雖然從高位回落最多接近九千點，但從2017年頭北水湧港起步點22000點計算，其實仲未失守。
第二度防線樓市，傳統話股市行先樓市6個月。恒指今年1月29日見頂33484點；今浪樓市升幅最勁係細價樓，中原城市中小型單位領先指數7月29日見頂報189.44點，巧合地剛好6個月。
第三度防線失業率明顯係最滯後指標，97年6月樓價見頂後，到98年1月失業率升破3%開始經濟下行。2008年3月樓價見頂，同年10月失業率升破4%見證全面轉勢。估計樓價轉勢大概7個月後失業率見真章。最新失業率為2.8%，即明年2月數字就業最關鍵：如果破4%即有如海嘯重演；如果到時冇事，即係影響不大。
G20前肯定多事，睇呢三個指標判斷後市，肯定準確過日日追特朗普Twitter。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.finance.appledaily.com