智取大市 - 晉佳 2018年12月21日
智取大市：樓市鬆綁意義大 - 晉佳
大陸市政府驚死啲人太有信心盲搶樓，照睇暫時可以假設大陸樓市未咁快爆煲。 資料圖片 適中字型 較大字型
美股近排跌到反艇，A股都有準備碌落山之勢。近排避險股接連破頂，繼而醫藥、教育股破底跌。美國加息後，輪到周期股掟貨。熊市當中，避險股逆市跑贏一段時間後，多數都係整體大市唔理避唔避險一齊跌，以下跌動力嚟睇，月線圖保歷加通道下軸約24300點不會是底，但留意，歷史上恒指跌低到偏離下軸係中線撈底好時機。
上期先以估值去講港股，除非樓價大跌，恒指護城河係市賬率1倍，即估計明年3月業績期後大約22000點。
問題係，樓市爆唔爆。凱滙平啲搶餐飽，香港樓市準買家信心未磨滅。至於大陸，近排聽返內地業界人士都形容係差，但未至於爆煲。喺呢個時候，山東菏澤取消限售，然後到廣洲、珠海，個個市政府住建局唔係派定心丸刺激市場信心，而係耍手擰頭話唔係鬆綁，驚死啲人太有信心又去盲搶樓咁。似乎暫時可以假設樓市未咁快爆煲。
睇返對上一次內地樓市調控鬆綁，就係2014年4月南寧成為全國首個鬆綁城市，之後發生乜事？上證指數同月試完2000點鐵底，橫行唔夠3個月，再由7月起步，升到2015年港股大時代嗰期5000點樓上！係過去10年A股唯一大炒特炒嘅時間。今次又點，至少呢個訊號有一定意義吧。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com