大行一改價 弱股馬上插
2019年01月09日
港股昨日微升38點，股份明顯個別發展，部份股份被大行唱淡急插，資金繼續流向避險股同地產股。
大行唱淡立竿見影
中美進行第二日貿易談判，會前雙方努力營造良好氣氛，副總理劉鶴早一日閃現會場，表現友好姿態，又傳中國會再買美
國農產品。不過，按正路今輪只係副部長級會議，主要聚焦點係增加中國入口美國貨議題，按道理唔會達成全面協議，除非特朗普又有出格行為，即時拍板話搞掂，否則最多都係搞吓階段性協議，或者發聯合公報製造吓良好氣氛。港股亦在觀望，未能一鼓作氣衝破26000點。恒指收報25875點，升39點；國企指數收報10133點，升9點，成交745億元。
昨日有兩隻大股插得好應，一隻係吉利汽車(175) ，單日大挫11%，收報10.22元。另一隻係小米集團(1810) 急跌7.5%，收報11.1元。兩隻股份大幅回落，都係因為有大行唱淡。
吉利畀麥格理發表研究報告調低盈利預測，報告話，吉利2019年銷售目標為151萬輛，大致按年持平，同時計劃年內將吉利品牌分銷商，由約1000間減至約800間。麥格理估計，喺銷售持平同競爭加劇下，2019及2020年毛利率預測分別下調1.4個百分點及1.6個百分點，加上經營成本上升，2018至2020年每股盈利預測分別下調10%、31%及36%，評級由「跑贏大市」降至「中性」，目標價由24.7元削至11.9元。
另一間大行德銀都話，吉利2018年銷量及2019年銷售目標低過該行預期，並指出近期市場關注公司至2018年底止存貨上升。
大行調低吉利預測另一個原因，估計係同公司發表新業務目標有關。實際上吉利去年開始反映行業見頂影響，股價由28元大插下來，到O依家市值差唔多唔見七成。汽車係周期循環性行業，盈利相當波動，在盈利增長時給予高市盈率當係增長股，係非常危險的事。現在大行分析員見到資料數字先調低預測，多少有點滯後，只能話係面對現實，但醒目資金應該一早沽貨，過完年更加速減持。從吉利今年五個交易日均下跌，累跌達25%，可見到全面拋售水平。或許持貨多的基金去年底忍住唔沽，以免自己沽低股價，拖低基金整體表現，一過完年翻開新一頁，就斬纜離場。
吉利現時市盈率7.1倍，息率2.5厘，數字上幾吸引，但車市逆轉，利潤可以跌得好快，所以歷史數字唔可靠，美好盈利前景嘅舊夢不須記，加上估值又跌，變成兩面都縮，股價於是插完再插。從中線角度睇，吉利已大幅調整，一輪拋售後唔排除會超賣反彈。由於車市仍在尋底鞏固，業績唔會一時三刻扭轉，要撈底可慢慢候機會分段吸納。
另一隻逆市急跌嘅係小米，小米再試新低，理由有兩個，一個係今日係小米上市半年，部份投資者及員工認購權喺上市半年後解禁，對股價有壓力。另一個就因為有大行唱淡，德銀發表報告指，該行最近與小米管理層會面，認為公司正努力應對宏觀困局及智能手機市場轉弱等環境，兩者均為公司盈利帶來下行壓力，認為隨著禁售期在1月9日完結，加上短期逆風或會令股價受壓，但今年下半年勢頭或會復甦，維持「買入」評級。該行將小米2018及2019年按非國際會計準則計算，每股盈利預測分別下調3%及27%，目標價由21.4元降至18.6元。摩通亦將小米目標價由18元大劈至10.5元，評級由「增持」降至「中性」。
特首降溫地產股照升
大行回歸現實，大幅下調過去睇好股份嘅目標價，股價立刻下插，說明投資者風險胃納好低，資金繼續避入防守性股份，形成強弱兩極。中國鐵塔(788) 急升6%，收報1.55元，有大行匯證亦加入唱好。其他5G概念股如中通服(552) 收揚6%，報6.82元；京信(2342) 收漲5.3%，報1.59元。
財政司司長陳茂波指出，會綜合考慮四項因素，研究調整按揭成數，市場憧憬樓市減辣，令地產股再升。雖然特首林鄭月娥出來降溫，差唔多講到唔會改變按揭成數，變相插波哥。但覓地小組無料到，加上市場睇死政府喺經濟唔好下，唔敢向樓市落重藥，地產股成為避風港。長實(1113) 獲李嘉誠基金會增持，股價收飆3.3%，報62.5元；新世界(017) 收揚3.1%，報11.18元；嘉里(683) 收升2.2%，報28.15元；新地(016) 收升1.1%，報119.5元；恒地(012) 收升1%，報41.6元；信置(083) 雖然只漲0.4%，報14.38元，但去到一年高位。地產股累彈都幾多，再追就要小心股份回頭，但從成個板塊呢輪表現，說明香港做地產喺大家心目中係無得輸。
陸羽仁
金融High Tea 舊文
來源 source: http://hdfin.stheadline.com