魚樂無窮 - 唐牛 2019年2月26日
魚樂無窮：殘股博禾雀亂飛 - 唐牛
中港股市一片歌舞昇平，冇人知幾時爆煲，一句到尾，記得用注碼控制風險。 資料圖片 適中字型 較大字型
特朗普宣佈推遲中美貿易戰談判死線，中港股市一片歌舞昇平，滬深300指數步入技術性牛市，整體成交突破1萬億人仔；這邊廂港股一度突破29000點，成交更達1,688億元，券商股、保險股甚至仙股炒到飛天，熱鬧非常。
究竟幾時先升完？又或者幾時調整？調整後又會否再上？股神都唔識答，現階段熊仔街貨重倉區落在29000至29200點，再配合期指結算在即，唔排除挾多浸就要唞唞，所以分段食糊絕對冇壞。一句到尾，用注碼控制風險。想知幾時會爆煲？當你行街搭車食飯睇戲都見到有人講股票，就肯定離頂不遠，去年1月港股破頂然後炒爆，就係咁樣。
低殘股利邦（891）噚日特別吸引我的眼球，事緣友報專訪了新大股東山東如意集團，內容大概關於如何內部調整、締造協同效應，然後重新上路。如意集團乃內地紡織行業一哥，去年初以1.2元購入利邦逾五成股權，以噚日收市價0.35元計，深潛超過七成。今次突然接受傳媒訪問，係咪暗示有搞作，或者業績有曙光？無論如何，利邦處於歷史低位，現價入場博禾雀亂飛，低風險高回報之選也！
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.finance.appledaily.com