A股基金即開即食
2019年02月26日
港股噚日開市先升後反覆，但內地A股大翻身，幾大指數齊齊爆升超過5%，應驗咗我噚日嘅講法，內地大玩牛市。恒指受內地帶動回勇，幅度唔算太大，但金融相關股份，特別係券商股齊齊爆上。
習明言金融係核心
A股大幅造好，除咗已有走向牛
市趨勢外，另一大理由係中共中央政治局喺上周五(2月22日)就完善金融服務、防範金融風險舉行第十三次集體學習。習近平喺主持學習時發表咗重要講話，就推動金融業高品質發展作出重要部署。新華社梳理咗總書記嘅重要講話內容，當中特別強調習近平指出，「金融是國家重要的核心競爭力，金融安全是國家安全的重要組成部份，金融制度是經濟社會發展中重要的基礎性制度。」談話又講到金融業嘅市場結構、經營理念、創新能力同服務水準，仲未適應經濟高品質發展嘅要求，好多矛盾同問題仍然突出。
習大大講話中，最值得留意嘅係「金融是國家重要的核心競爭力」，過去從來冇呢種講法，反映最高領導層開始重視股市，亦都說明咗點解中央要換走中國證監會主席劉士余，因為喺佢任內股市死吓死吓，結果就「燉冬菇」。現任中證監主席易會滿，大有「行運醫生醫病尾」嘅感覺。
喺習大大發言效應下，三大股指紛紛漲超過5%，上證指數收市報2961點，漲幅達5.6%；深成指數報9134點，漲幅相若，兩市成交額達10406億元，創2016年以來新高。
牛市呼聲漸高，場外資金跑步入場。喺資金湧入下，兩市超過250隻股份漲停板，包括大金融板塊掀起漲停潮，42隻券商股升停板，中國平安、中信證券成交額超過百億元。受噚晚華為發佈5G可折疊屏手機消息刺激，華為、柔性屏幕同5G概念股集體向上，京東方A股漲停板，成交額突破百億，東方通信收穫10個漲停板。由於內地勢頭強勁，估計港股都會繼續被拉動，所以內地當炒股，港股都可以留意吓。
A股勢強香港跟炒
A股發威，恒指收報28959點，表面上只係升143點，升幅0.5%；但國企指數收報11631點，漲203點，大升1.8%，呢個升幅遠勝恒指升幅，顯示資金湧入國企，成交爆上1688億元。
噚日受捧嘅基本上係同A股關連公司，最直接係A股基金，陸羽仁上周五喺《巴士的報》網站同噚日喺本欄推介嘅安碩A50中國(2823) ，噚日急升6.1%，收報14.28元，兩個交易日累升近8%，當日買咗已經有骨落地，噚日早市上車一樣可以即開即食。其他A股指數基金如華夏三百(3188) 上升6.6%。O依家內地玩緊牛市，大家順勢而炒，亦可以再坐一陣食得深啲。
壽險係爆升內資股當中嘅大板塊，被稱為內地壽險大笨象嘅中國人壽(2628) 亦不甘後人，急升6.8%，收報22.65元；新華保險(1336) 收報39.75元，上升7.7%。國壽管理層早前同投資界會面，多次提及改革薪酬架構，同公司業績掛鈎，特別係銷售同投資表現，呢個係期待已久喚醒沉睡巨人嘅第一步，新任主席制定高層管理薪酬嘅方程式，同價值以及盈利掛鈎。
大摩話，國壽希望透過交叉銷售，加強城市銷售，若然成功，將會令公司盈利復甦，為股東創造價值，雖然因為管理層未透露具體目標，現階段難以量化對公司盈利嘅正面影響。內險大笨象發威，但係一向表現突出嘅平保(2318) ，升幅只有5%，收報84.1元，但交投罕有壓過騰訊(700) 。同屬保險但唔屬內資嘅友邦(1299) 收報76.6元，微升0.1%，但就創新高贈興。
同內險股一樣大升嘅有券商股，中信證券(6030) 升4%，收報20.4元；廣發證券(1776) 收報14.02元，上升8.3%。
陸羽仁
金融High Tea 舊文
來源 source: http://hdfin.stheadline.com